DAKO ang pasalamat sa Davao City Police Office (DCPO) ngadto sa mga isponsor sa ilang "Pamaskong Handog Alay sa Kabataan" nga gisugdan niadtong unang semana sa Disyembre.
"Dako atong pasalamat sa atong mga sponsors kay kung di pod tungod nila, di madugangan ang atong mga regalo nga atong ihatag sa kabataan," ingon ni DCPO spokesperson Senior Inspector Ma. Theresita Plaza-Gaspan pinaagi sa telepono kagahapon.
Gipangunahan ang maong programa sa mismong direktor sa DCPO Senior Supt. Alexander Tagum kinsa nagtumong sa 10,000 ka mga benepisyaryo ang ilang mahatagan og regalo karong bulana.
Ang dose ka istasyon sa kapulisan sa DCPO dunay ipahigayong programa alang sa ilang mga nalista nga mga tinun-an sa mga Day Care Centers sa ilang matag area of responsibility (AOR).
"Way ni siya nga bisan gamay mapalipay nato ang kabataan, diin panghatagan nato sila og mga toys, food ug mga nagkadaiyang souvenir karong Pasko," ingon ni Gaspan.
Sa pikas bahin, kagahapon nanghatag og 1,050 ka mga grocery packs ang Philippine Chinese Chamber of Commerce and Industry, Incorporated, Davao City - Chapter inubanan sa kapulisan ug kasundalohan didto sa Magsaysay Park, ning siyudad.
Ang mga grocery packs gipaabot sa mga napiling benepisyaryo nga anaa nagpuyo palibot sa China Town diin gipangunahan ang programa sa Sta. Ana Police Station pinaagi sa station commander, Chief Inspector Nolan Raquid. (Jeepy P. Compio)