NAKATAKDANG makadawat og hinabang pinansiyal ang mga nasunogan sa Marang Street, Barangay Wilfredo Aquino, Agdao District, siyudad sa Davao nga miulbo pipila ka minutos sa pagsugat sa Bag-ong Tuig.
Subay sa datus sa City Social Services and Development Office (CSSDO) dunay 54 ka mga house owners; diin 52 ka mga balay ang naguba ug duha niini ang na-damage.
Natala sab ang 31 ka mga sharers, 20 ka mga renters ug 17 ka mga boarders.
Subay sa spot report sa Sta. Ana Police Station, alas 12:15 sa tungang gabii nagsugod ang pag-ulbo sa kalayo.
Si Jay Bantillan usa sa mga nakakita sa pagkusog sa aso gikan sa amakan nga balay sa usa ka alyas Bordado duha ka metros gikan sa iyang kuwarto diin taud-taod mikalit og silaob ang kalayo.
Tulo ka oras gibugno sa kabomberohan ang pagpalong sa kalayo diin milamoy ang dul-an 60 ka mga panimalay.
Sukad sa pagsulat ning balita, wala pa mihatag og initial investigation report ang Bureau of Fire Protection (BFP) Davao City Fire District kung pila ang danyos ug hinungdan sa kalayo.