Namaligya'g marijuana napatay | SunStar

Namaligya'g marijuana napatay

Time to read
less than
1 minute
Read so far

Namaligya'g marijuana napatay

Sunday, January 14, 2018

USA ang patay sa unang buy-bust operation sa tuig 2018 sa Davao City Police Office (DCPO), Sabado sa gabii.

Napatay sa Talomo Police Station ang usa ka John Renner Solante De Jesus, hamtong ang pangedaron.

Sumala ni Chief Inspector Ronald Lao, hepe sa Talomo Police Station, nga nakigsabot ang suspek ngadto kanila nga mobaligya og pinaugang dahon sa marijuana.

Nasabutan sa grupo ug sa suspek nga didto magkita sa kanto sa mga dalang Jacinto ug Juan Dela Cruz, sa Brgy. 32-D, Davao City.

Apan pagka-alas 12:20 sa tungang gabii, namatikdan sa suspek nga mga pulis ang mipalit kaniya hinungdan nga mibunlot kini sa iyang .38 revolver dayon gipamusil ang mga pulis.

Nanalipod ang mga pulis sa ilang kaugalingon hinungdan nga mibalos kini'g niyutralisa sa suspek dayon gidala siya ngadto sa pinakaduol nga ospital apan nakabsan kini sa kinabuhi.

Nakuha sa posisyon sa suspek ang usa ka .38 revolver nga dunay upat ka mga buhing bala; P1,000 nga marked money; ug ang usa ka kilo nga pinaugang dahon sa marijuana sud sa Nike bag, kolor itom.

Gidala sa Angel Funeral Parlor ang patay nga lawas sa suspek.

Apan bersiyon sa mga kabanay nga nahinabi sa Superbalita, di sila makatuo nga misukol ang ilang kabanay sanglit wala kini armas ug wala nila kini makita nga dunay dala-dalang pusil.

Nanawagan ang mga kabanay nga kung dunay man galing binuhatan nga dautan ang pipila, di kini patyon ug ipaagi unta sa proseso sa balaod ngadto sa prisohan aron magbag-o.

Gipatik sa mantalaang Superbalita Davao Enero 14, 2018.

View Comments