GITAKDA na ang groundbreaking sa gambalay sa Children's Institute nga dunay kapasidad nga 200 ka mga kama nga tukuron sud sa tugkaran sa Southern Philippine Medical Center (SPMC) karong tuiga.
Kini aron nga matubag ang paghuot sa pedia ward.
Si Doctor Michael Manalaysay, tsirman sa SPMC's Pediatrics Department, nagsulti ngadto sa mga tigbalita atol sa senimanang tigum kagahapon didto sa The Annex Building, SM City Davao isip kabahin sa infrastructure development plan sa ospital, laing gambalay alang sa kabataan mobarog.
"We will build a Children Institute it will be a new building. The groundbreaking will start second or third quarter of the year," butyag niya, nga ipahimutang salikod sa SPMC.
Giangkon niya nga ang paghuot sa pasilidad sa ilang ospital mao nay nahimong problema sulod sa SPMC kon diin napugos sila sa pagpahimutang og duha ka pasyente sa usa ka kama.
"That will help us decongest," dugang pa niya.
Gikanayon sab niya nga ang ilang departamento maoy pinakadako nga pediatric department sa Pilipinas kon hisgutan ang gidak-on.
Sumala niya, ang ilang matag adlaw nga admisyon moabot og dul-an 500 samtang 200 ang konsultasyon alang sa mga outpatient matag adlaw nga mosumada ngadto sa 4,000 matag bulan.
Sa pikas bahin, ang Emergency Room (ER) admissions ug konsultasyon moabot og 100 hangtud 200 matag adlaw.
Gawas gikan sa paghuot, iya sab nga gitumbok ang panginahanglan alang sa dugang pediatric doctors aron nga moatiman sa mga pasyente.
"That's why we need more pediatric residents, we need 45 residents. As of this time 33 lang yong resident namin," tin-aw pa niya.
Ang gambalay, matud niya, matapos sa sunod tuig o sayo sa 2020.
Sa dihang gipangutana bahin sa badyet nga gialokar alang sa gambalay, si Manalaysay nagsulti nga di siya makahatag og saktong kantidad apan matud niya nga ang 100-bed capacity nga gambalay lang nagkantidad og P1 bilyon. (Juliet C. Revita)