Nakigbulag sa boyfriend giluba og gunting | SunStar

Nakigbulag sa boyfriend giluba og gunting

Time to read
less than
1 minute
Read so far

Nakigbulag sa boyfriend giluba og gunting

Saturday, January 20, 2018

MITUGPA sa tambalanan ang usa ka babaye human gidunggab sa iyang uyab kay di kini kadawat nga buwagan na siya.

Alas 9 sa gabii niadtong Biyernes gidala sa Southern Philippines Medical Center (SPMC) ang biktima nga si Janice (bansagon gitago), 23, nagpuyo sa Rizal Extension, Barangay 35-D, Poblacion, dakbayan sa Davao.

Subay sa logbook sa Trauma Complex sa SPMC, ang biktima nakaangkon og samad sa kamot agi'g dinunggaban sa gunting.

Saysay sa ig-agaw sa biktima nga maoy naghatud niini sa SPMC, giingong gikan pa sa Manila ang biktima kinsa mianhi lang sa Davao aron sultihan ang uyab nga si Ricky nga putlon na nila ang ilang relasyon.

Sa ilang pag-istoryahanay, giangkon ni Janice nga naa na siyay laing lalaki nga maoy mipapitik sa iyang pagbati sa Manila.

Hubog si Ricky niadtong higayona ug puwerting sukoa sa iyang nadungog gumikan di niya madawat dihang una na niyang nahibal-an nga duna nay laing uyab si Janice.

Sa kasuko ni Ricky, mikuha siya'g gunting dayon iyang gidunggab si Janice, apan nakalikay kini ug didto lamang sa kamot maigo.

Hinuon, bisan pa man nga nasamdan si Janice, di niya buot ipa-priso si Ricky gumikan giingong di niya malimtan ang ilang mga matam-is nga kagahapon.

Ang biktima nakagawas na sa ospital kagahapon sa buntag.

Gipatik sa mantalaang Superbalita Davao Enero 21, 2018.

View Comments