Truck kargado'g binangay gisunog | SunStar

Truck kargado'g binangay gisunog

Time to read
1 minute
Read so far

Truck kargado'g binangay gisunog

Saturday, January 20, 2018

PANTUKAN, ComVal Province -- Naugdaw ang forward truck human gisunog sa duha ka mga armadong lalaki.

Ang insidente nahitabo sa Sityo Patilan, Barangay Bongbong, alas 04 sa hapon, Biyernes, Enero 19.

Segun sa taho sa awtoridad nga midangop sa Pantukan Municipal Police Station (MPS) si Randil Beltran, drayber. Gipatala niini ang insidente human gisunog ang iyang gimanehong truck.

Paspas nga miresponde ang mga sakop sa Pantukan MPS ug naglusad og imbestigasyon.

Base sa pasiunang imbestigasyon sa kapulisan, usa ka Isuzu Forward L120 ang gisunog, dunay plaka WHM 950, gipanag-iya ni Dailyn Ilgincolin nga kargado og saging nga binangay.

Miguwa sa imbestigasyon nga duha ka wala mailhing mga lalaki nga lulan sa Honda XRM nga motorsiklo ang miabot ug gisunog ang truck.

Human masilabi ang truck, daling miiktad ang mga suspek paingon sa Sityo Upper Pangasinan, Kingking, Pantukan.

Nag-alayon ang Pantukan MPS ug 1101st Maneuver Company ug 11th Regional Public Safety Battalion ug naglusad og pursuit operation.

Padulong pa lamang ang mga awtoridad, nagsumbong na ang mga molupyo kalabot sa motorsiklo nga milabay paingon sa hilit nga dapit.

Gisundan sa kapulisan ug kasundalohan ang direksiyon sa motorsiklo. Pag-abot sa lugar, gipusil sa mga suspek ang kapulisan ug kasundalohan busa natigayon ang pinusilay.

Atol sa clearing operation, narekober ang Honda XRM, pula ang bulok, dunay plaka IU 1077.

Narekober sab sulod sa utility box sa motorsiklo ang unom ka wala pa makabuto nga bala sa kalibre .45 nga pistola, usa ka caliber .38 nga pistola nga dunay unom ka wala pa makabuto nga bala, usa ka basiyo sa bala sa caliber .38 nga pistola ug duha ka basiyo sa bala kalibre .45 nga pistola.

Ang narekober nga mga ebidensiya gikustodiya sa Pantukan Municipal Police Station. Nagpadayon pa ang imbestigasyon sa kapulisan. (Rockyben S. Catisay)

Gipatik sa mantalaang Superbalita Davao Enero 21, 2018.

View Comments