Nag-ilog sa Valentino, nagbugno | SunStar

Nag-ilog sa Valentino, nagbugno

Time to read
less than
1 minute
Read so far

Nag-ilog sa Valentino, nagbugno

Wednesday, February 14, 2018

WALA mahinayon ang pag-date sa Valentine's Day sa usa ka 32-anyos nga dalaga ug bana sa iyang silingan kay nasakpan sa asawa ang ilang sekreto pinaagi sa text messages sa cellphone.

Mitugpa sa Southern Philippines Medical Center (SPMC) aron mokuha og medical certificate ang 32-anyos nga ginang kay nasakpang nakigtext sa bana sa iyang silingan nga kasabot mag-date sa Valentine's Day kagahapon.

Subay sa blotter nga natala sa Tugbok Police Station, mipatala si Mercy (bansagon gitago), 32, dalaga, residente sa Barangay Los Amigos, Tugbok District, Davao City.

Saysay ni Mercy nga giayo siya'g bugno ni Nancy, 30, nga iyang silingan kay nasakpan niini ang iyang gi-text sa bana ni Nancy nga, "Langga, mag-date ta ugma, kay Valentine's Day man."

Didto miulbo ang kasuko ni Nancy, hinungdan nga iyang giadto sa balay si Mercy, gipagawas kini, dayon giayo'g bugno, hinungdan nga nakahiagom kini og mga bun-og ug mga kinarwasan sa lawas.

Ang lalaki nga maoy bugtong Valentino sa asawa, gisuwayan pag-ilog sa silingan mao nga nahitabo ang bugno.

Ang mga nahisgutan nakatakdang husayon sa Barangay Los Amigos sa mosunod nga mga adlaw.

Gipatik sa mantalaang Superbalita Davao Pebrero 15, 2018.

View Comments