GIHIKAY na sa Department of Agriculture (DA) sa lalawigan sa Davao Occidental ang pagtabang sa mga mag-uuma sa pag-proseso sa mga buot mangutang aron masuportahan ang ilang umahan.
Kini maoy resulta sa gitanyag nga tabang ni DA Secretary Emmanuel Piñol human gibisita ang lalawigan sa miaging bulan ug misaad nga atimanon sab ang mga farm-to-market road sa lima ka mga munisipyo.
Human gipaabot sa mga mag-uuma ang ilang suliran sa umahan, misaad ang DA nga dili kini pasagdan.
Gihangop sab sa mag-uumang si Orlando Indrina ang nahimong tubag sa DA sa ilang mga mulo kay alang niya, apektado gyud ang ilang kita tungod sa kataas sa presyo sa ilang itanom ug hilabihan kabarato ang palit atol sa ani.
Gibasol sa mga mag-uuma ang floor price sa tanang klase sa produkto mao nga barato na lang ang palit panahon sa ani.
Gikalipay sab ni Governor Claude Bautista nga giasikaso sa DA ang suliran sa ilang mga mag-uuma aron moalibyo ang panginabuhian niini.
Adunay gigahin ang DA nga P5,000 ngadto P50,000 aron ipautang sa mga mag-uuma nga walay kolateral ug anaa lamang sa 6 porsyento ang interes matag tuig gawas nga aduna pay loan equipment program nga gitanyag kanila.
Samtang si Bautista nagmando sa mga otoridad nga tutukan ang illegal fishing sa lima ka mga munisipyo human nga hatagan sila sa DA og mga patrol boats aron mobantay niini.
Gitakdang ipailawom sa training sa Agricultural Credit Policy Council ang mga mag-uuma ug mananagat nga mopailawom sa pagpangutang. (Orlando B. Dinoy)