JAS, Davao Occidental -- Sa nagpadayong kasaulogan sa ika-walo nga "Kapyaan Festival" gipasundayag sa lokal nga gobyerno ang "et day" diin gipakita ang kultura ug tradisyon sa mga Tribung Manobo ug B'laan.
Gisugdan ang selebrasyon niadtong Pebrero 15 diin si Presidential Son Sebastian "Baste" Duterte ang miadto sa lugar nga gihangop sa mga molupyo.
Gipaagi og sayaw sa mga tinun-an sa tunghaan ang paghulagway sa ilang panginabuhi sa pagpanguma ug gipasundayag ang mga produkto sama sa basket, cacao, mani, saging ug uban pa.
Matud ni Bise Mayor John Jason Joyce nga buot nilang mapalambo ang ilang turismo ilabi na nga nindot ang magpahigayon og surfing sa ilang kadagatan.
Gipasabot ni Joyce nga angayang mahatagan og importansya ang kultura sa mga Manobo ug B'laan mao nga di mawagtang ang mga nag-unang tradisyon sama sa bugno sa kabayo.
Hilabihan ang pag-asenso sa lugar luyo sa gilay-on niini sa siyudad mao nga gibutangan nila kini og mga nindot nga talan-awon sama sa baywalk diin gipabarog ang mga simbolo sa agrikultura, aqua-tourism ug tradisyon sa mga Indigenous People's (IP's) nga daghan ang nagpahulagway.
Wa sab magdahom ang mga molupyo nga makit-an nila ang taxi driver nga nag-viral sa social media nga si Elcias Bugsad kinsa mihatag og lingaw atol sa opening ceremony.
Niadtong Sabado, nakigtagbo ang mga opisyal sa Sangguniang Bayan ug mga personahe sa Department of Education (DepEd) diin gihimo ang deliberasyon sa project design nga P2,000,000 support sa lokal nga gobyerno ngadto kanila.
Matud ni Joyce nga nasabutan sa tigum nga direktang makuha sa tanang tunghaan sa elementary ug sekondarya ang ilang badyet ug gikinahanglan lamang nga iduso ang usa ka resolusyon sa Parents Teachers' Association (PTA).
"We will allocate P700,000 for LGU-paid teachers of our extension classes. Tentatively, P400,000 is earmarked for municipal and provincial activities," asoy ni Joyce.
Samtang, nalingaw ang mga bisita ug katawhan sa lugar atol sa Drum and Lyre Competition (High School Category) niadtong Dominggo.
Nahimong kampeyon ang Nuing (Edna Guillermo) High School sa kompetisyon ug first runner up ang Balangonan National High School, 2nd runner up ang JAS National High School, 3rd runner up ang Culaman High School; ug 4th Runner Up ang Tabayon High School.
Kini na ang pinakasadyang kasaulogan sa 8-anyos nga Kapyaan Festival sa lugar diin nanghinaut ang lokal nga gobyerno nga daghang turista ang modayo kanila sa mga mosunod nga selebrasyon. (Orlando B. Dinoy)