NATAPOS kagahapon ang tulo ka adlaw nga National Special Weapons and Tactics (SWAT) Challenge 2018 nga gipahigayon sa Team Davao Firing Range sa Maa, dakbayan sa Davao.
Ang kaugdahan gisalmutan sa kasundalohan, kapulisan ug uban pa nga mga law enforcement agency sa tumong ug katuyoan aron mas mabaid pa ang ilang kahanas sa pagpunting ug pagsagubang sa mga pagsulay panahon dunay insurhensiya.
"Napakagandang aktibidad ito sa ating kapulisan at kasundalohan para nang sa gayon mas mahasa pa ang kanila kagalingan," ingon ni Police Regional Office (PRO) 11 director Chief Supt. Manuel Gaerlan.
Nasayran nga mokabat sa P300 mil ang madag-an sa mamahimong kampeyon, samtang P200 mil ang 1st placer, P1,000 ka libo ang 2nd placer.
Gawas niini, mopagula sab og P50 mil nga premyo alang sa individual winners, ug magdugang og premyo si Pangulong Rodrigo Duterte alang sa mga mananaug.
Si Philippine National Police (PNP) Chief director general Ronald dela Rosa nga kahigayonan kini sa mga SWAT sa rehiyon nga mas mapalig-on ang ilang katakus, estamina ug camaraderie.
Si dela Rosa naghangyo nga mas palambuon pa sa SWAT ang ilang katakus samtang nakigsangka ang nasud batok sa terorismo ug insurhensiya.
Ang listahan sa mga mananaug sa tigiay sa pagpunting ipagula sa PRO 11 sa mosunod nga mga adlaw. (Jeepy P. Compio)