MAGSAYSAY, Davao del Sur -- Nanaghap ang kapulisan sa lugar nga mokunhod na ang mga kasong pagpamatay sa Davao del Sur ug silingang probinsya sa Davao Occidental.
Gikumpirma ni Senior Inspector Edilberto Cabillo, hepe sa kapulisan ning lugar, nga dili mga rebeldeng New People’s Army (NPA) kundi mga “gun-for-hire” ang mga suspek nga nasikop nila human gipatay ang biktimang si Candido Plaza Jr., mag-uuma sa Purok 3, Barangay Balnate, kinsa gipasanginlan nga kawatan og mangga.
Kahibaloang nagsakay og L300 Van ang mga suspek nga nailhang sila si Bryan Cuevas Sarsona ug half-brother nga si Wowie Sarsona Grabines, pulos molupyo sa Sitio San Vicente, Barangay San Isidro ug drayber sa van nga si Ferdinand Aguilar Lee, taga Sitio Manggahan, Barangay Matti, Digos City.
Miresulta sa teleseryeng ginukdanay sa kapulisan ug mga suspek ang nahitabo human kusog kaayo kining nagpadagan una nalit-ag ug wa na sab makapabuto sa ilang mga armas.
Si Cabillo nagbutyag nga giduso na nila ang kasong murder ug attempted murder dihang naangol ang usa ka alyas “Peping” ug apil nga gikasohan ang babayeng financier sa mangga nga mao si Hanelyn Schroeder, kinsa nakasibat na kini human sa insidente.
Mga suspek gihapak sab sa kasong paglapas sa RA 10591 kun illegal possession of firearms dihang nakuha sa ilang posisyon ang usa ka M16 rifle ug kalibre .45 nga pistola nga gigamit sa krimen.
Apan, di masulti sa kapolisan kun gikan sa gobyerno ang M16 riffle nga gihuptan sa mga suspek sanglit napapas na ang serial number niini.
Sa pagpanubay sa Sun.Star Superbalita nasayran nga ang suspek nga si Bryan Cuevas Sarsona, alyas Enik, aduna pa’y pending warrant of arrest sa Regional Trial Court (RTC) Branch 21 nga gilagdaan ni Presiding Judge Loida Posadas-Kahulogan ug nakadoket sa criminal case XXX-1460 (09) sa kasong murder.
Dako ang pagtuo sa kapulisan nga ang mga suspek mao sab ang responsable sa pagpamatay sa ilang lungsod ug uban pang dapit sa duha ka lalawigan.
Apan, wa na miluwat og pahayag ang mga suspek nga nakapadlak na sa ilang selda.
Gihangop sab ni Mayor Arthur Davin ug mga molupyo ang paspas nga pagkasikop sa mga suspek timailhan nga alerto gyud ang kapulisan sa lungsod.
Sa miaging bulan, mga tag-as nga kalibre sa armas sab ang nakumpiska human gitinguha sa mga NPA nga ipalusot kini didto sa Barangay Takul apan abtik nga nakig-alayon ang kapulisan ngadto sa militar hinungdan nga nakumpiska kini sa gimuntar nga checkpoint. (Orlando B. Dinoy)