3 tanker trucks gidakop
-A A +AThursday, November 25, 2010
ANG Environmental Management Bureau (EMB) sa Department of Environment and Natural Resources (DENR) malampusong misakmit sa tulo ka mga tanker trucks nga nagkarga og mga used oil nga way permiso niadtong Miyerkules.
Ang tulo ka mga tanker trucks nagkarga og kwarenta mil ka litrong used oil gikan sa barge sa National Power Corporation (NPC) nga nagpundo duol sa Holcim sa Barangay Ilang, ning siyudad.
Si EMB Regional Director Metodio Turbella nagbutyag sa Superbalita nga ilang gisikop ang tulo ka mga tanker trucks human sila nakadawat og impormasyon nga way papeles ang operator niini nga si Ryan Co.
"Nakadawat mi og report gikan sa concerned citizens nga naay nagkarga og used oil nga mga tankers mao nga among giatangan sila sa pantalan sa Ferry Boat sa Kilometer 11, Barangay Sasa," pahayag ni Turbella.
Si Turbella nagbutyag nga ilang gisikop ang tanker trucks gumikan kay way permiso gikan sa ilang buhatan ang tag-iya niini nga si Co.
"Among gi-check ang among records sa opisina apan wala silay permit mao nga amo silang giharang karon," ni Turbella human gisikop ang mga drayber sa tanker trucks sa alas 7:00 pasado sa gabii niadtong Miyerkules.
Ang tanker trucks gisakay sa ferry boat paingon sa barge sa NPC aron magkarga og used oil ug pagkahuman, modunggo sa pantalan sa ferry boat aron mobiyahe na sab paingon didto sa planta ni Co didto sa Barangay Tibungco.
Dihang gisusi ang papeles sa nahisgutan nga mga tanker trucks, nasuta nga sila dunay papeles nga nagdala sa pangalan nga Golden Dragon International Terminals Inc.
Si Boy Alce, Mindanao Area Manager sa Golden Dragon, nagbutyag sa Superbalita nga ilang susihon nganong dunay papeles ang mga dinakpan nga nagdala sa letter head sa Golden Dragon.
"Mao pa ni ang among susihon ugma kay gigamit lang ni nila ang pangalan sa Golden Dragon," ni Alce kinsa nagbutyag nga ang ilang kompaniya maoy nag-inusarang dunay permiso nga mopalit ug moproseso og mga used oil sa Mindanao.
Si Turbella nagbutyag nga makamulta ang kompaniya ni Co sa ilang buhatan sa kantidad nga P200-mil tungod sa ilang kalapasan sa balaod.
"Sa upat nila ka violations, makamulta sila og two hundred thousand," ni Turbella dihang nahinabi didto sa Sasa Police Station.
Ang tanker truck nga dunay plate number LVA-322, KVD-520 ug NBH-666 atua karon sa presinto sa kapulisan samtang wa pa mahusay ang ilang kaso. (AD)
Gipatik sa mantalaang SuperBalita Davao Nobiembre 26, 2010.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
