781 priso nahilo sa pagkaon

Thursday, December 16, 2010

SIYETE sientos otsentay uno ka mga piniriso sa Davao City Jail ang naimpatso human nila gikaon ang mga pagkaon nga gihatud kanila atol sa Pasko Fiesta sud sa City Jail niadtong Martes.

Ang pagkaimpatso sa mga piniriso gikompirma sa lokal nga kagamhanan nga 781 sa 1,017 ka mga piniriso nakasinati ud loose bowl movement (LBM) human nila gikaon ang food pack nga dunay fried chicken, gravy, pansit, ug kan-on sa ilang paniudto.

Have something to report? Tell us in text, photos or videos.

Si City Public Information Officer Giovanni Aportadera nagbutyag nga ang pagkaon alang unta sa ilang paniudto apan gikaon kini sa mga piniriso sa ila nang panihapon mao nga nagdaut ang ilang tiyan.

Gisulti ni Aportadera human sa pagpanakit sa tiyan sa mga piniriso, nagpadala dayon og mga personahe ug tambal ang City Health Office (CHO) aron matambalan ang mga piniriso.

Sa pagsuwat ning balita, 40 ka mga piniriso ang padayong gi-obserbahan sanglit padayon pa ang gibati nilang kasakit sa tiyan.

Si Atty. Jessie Marvin Melodias, hepe sa General Services Office, nagbutyag nga wa miagi sa iyang buhatan ang transaksyon sa mga food packs alang sa Pasko Fiesta sa City Jail.

Si Mayor Sara Duterte nagkompirma sab sa nahitabong pagkaimpatso sa mga piniriso, ug siya nagkanayon nga way accreditation ang caterer nga maoy nag-andam sa mga food packs.

"(I have) required the CHO to investigate, and issue a report to me. (I) demanded from the caterer to guarantee for the food and comply with health officer medical requirements. I instructed the City Mayor's Office not to pay the caterer until requirements are delivered and to ban the caterer from further service to the City Hall," ni Duterte pinaagi sa mensahe sa text sa Sun.Star Davao.

Dihang gisusi sa Superbalita kagahapon ang Davao City Jail, mga personahe nga nahinabi pinaagi sa telepono di sila makakompirma sa maong taho.

Sila nagsulti nga ang makahatag sa kompirmasyon niini mao ang ilang Jail Warden nga si Chief Inspector Erwin Kenny Ronquillo.

Apan, di mahinabi si Ronquillo sanglit duna siyay giatiman nga mahinundanong meeting sud sa Bureau of Jail Management and Penology (BJMP).