900 lumad apil sa rally

KAPIN kun kuwang usa ka libo ka mga lumad ang nisalmot sa panawagan alang sa kalinaw batok sa mga rebeldeng New People's Army kagahapong adlawa.

Didto sa lungsod sa Malita, Davao del Sur, gibana-banang anaa sa 700 ka mga lumad ang nisalmot sa peace rally samtang mga 200 sab sa dakbayan sa Digos.

Gihangop sa 39th Infantry Battalion (IB) ang gipakitang suporta sa mga iladong politiko sa lalawigan sama ni 1st District Rep. Marc Douglas Cagas IV, Hagonoy, Davao del Sur Mayor ug Ret. Gen. Franco Calida ug Barangay Kapatagan ug City Association of Barangay Council Pres. Juanito Morales.

Sagad sa mga lumad, mga lider ug representante sa nagkadaiyang tribo kinsa gipul-an na sa kanunay'ng pagpanghasi kanila sa mga NPA.

Didto sa Malita, suportado sab nila ni Mayor Benjamin Bautista ang kalihukan ilabi pa nga usa ka barangay kapitan sa ilang lugar ang di pa dugay gipatay sa mga NPA human magdumili nga mohatag sa iyang suporta sa kalihukan.

Si Lt. Raul Villegas, civil military operations (CMO) officer, nagkanayon sa Superbalita, nga buot nilang mahatagan og proteksyon ang mga lumad nga sagad ginahasi sa mga rebelde didto sa kabukiran.

Bitbit sa mga lumad ang mga plakards nga nanawagan sa mga NPA sa pag-undang sa ilang paghasi kanila.

Sumala pa nga apektado ang panginabuhi sa mga lumad panahon nga manghasi ang mga rebelde sa ilang dapit. (DD)