Armadong sakop ni Ampatuan nagtago lang sa Maguindanao

SI MAGUINDANAO Governor Esmael Mangudadatu nagbutyag nga dunay mokabat 600 ka mga sakop sa private armed groups ang pamilyang Ampatuan nga pabiling nagtago-tago karon sa mga hilit nga dapit sa ilang probinsiya.

Kini gipangulohan mismo nila Kanor Ampatuan ug Banahrin Ampatuan nga pulos mga armado sa mga tag-as nga matang sa armas.

Gihangyo ni Mangudadatu ang militar ug kapulisan nga palig-unon pa ang seguridad sa Maguindanao gumikan plano sa naasoy nga grupo nga molusad og pagpamomba, apil na ang surprisang pagpangatake.

Giangkon sa gobernador nga dunay gitahasan si kanhi Datu Unsay mayor Datu Andal Ampatuan Jr. nga grupo nga maoy molikida sa kaniya.

Mikatag ang balita nga P50 milyones ang patong sa ulo ni Mangudadatu hinungdan nga gipalig-on sa iyang mga security personnel ang seguridad, apil na sa iyang pamilya nga target sab sa maong grupo.

Giklaro ni Mangudadatu nga wala siya mahadlok sa iyang hulga tungod kay nagtuo siya nga ang iyang kinabuhi maoy mahimong instrumento alang sa kalinaw, panaghiusa sa katawhan, kalambuan ug kabag-uhan sa dagan sa politika sa Maguindanao. Ug andam niyang ihalad ang iyang kinabuhi alang niini.

Hinuon ang militar ug kapulisan miabag sa seguridad sa gobernador, ilabi na kon mobisita siya sa mga hilit nga dapit sa Maguindanao. (Edgardo Fuerzas)