Bayot giihaw

PATAY nang nakaplagan ang usa ka 'bayot' sud sa iyang balay sa alas 11:00 kagahapon sa buntag didto sa Barangay 21-C Poblacion, siyudad sa Davao.

Ang biktima mao si Jonathan Jimenez, 30, beautician sa Magic Touch Beauty Salon, sigun sa inisyal nga imbestigasyon sa Sta. Ana Police Station.

Si Jimenez nadiskubrehan nga wa nay kinabuhi pinaagi sa iyang ig-agaw nga si Rodrigo Bernardo mao nga iyang gipahibalo ang kapulisan aron imbestigahan ang maong hitabo.

Matud Bernardo nga iyang gisusi ang balay sa biktima sanglit wa na mipakita sa ila sukad pa niadtong Lunes, apan dihang iyang gihiling ang gihigdaan sa biktima nakaangkon og daghang samad dinunggaban.

Mga sakop sa Scene of the Crime Operatives (Soco) nga miresonde sa maong hitabo nagbutyag nga gihiwa sa suspek ang liog sa biktima nga miresulta sa iyang hinanaling kamatayon.

Sa gihimong pagsukit-sukit sa mga higala sa biktima, nasayran nga usa ka alyas Brian ang gikauban sa biktima sa ala 1:30 sa kaadlawon niadtong Lunes.

Si Vincent, higala sa biktima, nagbutyag nga ilang nakauban ang biktima sa alas 10:00 sa gabii niadtong Dominggo.

Suma niya nga human sa ilang panag-uban sa biktima, gibiyaan sila sanglit nagkita ug nakuyog sa pagpanglakaw sila Brian ug Jonathan.

Miguwa ang pagduda nga dunay relasyon ang biktima ug suspetsado apan nagkalalis sila hinungdan nga nahitabo ang duguon nga krimen.

Dunay nagsulti nga kagahapon pa sa buntag nagdaling milakaw ang suspek dala ang iyang mga butang mao nga nahiusa ang ilang pagduda nga siya ang naghimo sa krimen.

Gisusi sab sa kapulisan ang anggulo nga basin gitulis ang biktima sa suspek sa wa pa gipatay.

Naningkamot karon nga masayran sa kapulisan ang motibo ug masikop ang suspek aron prisohon ug taralon sa korte.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph