Gitigbas patay sa 3 nga gikaaway

USA ka lalaki wa na kaabot buhi sa ospital human gitabangan og tigbas sa tulo ka mga lalaki didto sa Purok Narra, Barangay Banlag, lungsod sa Monkayo, Comval Province, Dominggo sa gabii.

Nailhan ang biktima nga mao si Ritchie Laguna, 36, molupyo sa nahisgutang dapit. 

Sa report gikan sa Comval Province Police Provincial Office nasayran nga pasado alas 10:00 sa gabii samtang didto sa maong lugar ang biktima gitabangan matud pa siya og tigbas sa tulo ka mga lalaki nga iyang nakaaway nga nailhan nga mao sila Bryan Lumancas, 25, Janrey Lumancas, 19, ug si Joel Lumancas, 23, alyas Jojo, pulos molupyo sa Purok Siboli, molupyo sa maong barangay.

Nakahiagum og mga samad tinigbasan sa kalawasan ang biktima ug daling gidala sa Comval Provincial Hospital sa lungsod sa Montevista.

Apan wa na kalahutay ang biktima ug gideklarang dead on arrival sa mga doktor nga miatiman kaniya sa ospital.

Mga suspek dayong misibat padulong sa wa matino nga lugar sakay sa usa ka Honda Bravo nga motor human sa hitabo.

Kapulisan sa lungsod sa Monkayo mihimo na og dugang imbestigasyon sa maong hitabo.

Samtang manhunt operation gilusad na sab sa mga otoridad aron sa pagpangita sa mga suspek. (Marvin Pineda)