Lalaki gipatay sa anak sa gikainom

USA ka lalaki giluba sa dihang wala magkasinabtanay sa bayrunon samtang nag-inom sa amahan sa suspek sa tindahan didto sa Barangay Sibayan, sakop sa lungsod sa Bansalan, Davao del Sur.

Sumala sa kapulisan nga banda alas 4 sa hapon niadtong Biyernes nahitabo ang insidente.

Ang biktima giila nga si Elizar Gacang, 39, minyo ug negusiyante og baboy didto sa ilang lugar.

Ang 40 anyos nga asawang si Jocelyn, kinsa nahinabi sa Sun.Star SuperBalita, nipabuhagay nga nibiya ang iyang bana sa ilang balay banda alas 3:30 sa hapon aron moadto sa sentrong bahin sa barangay kay adunay paninglon.

Mao na lang iyang nahibaw-an nga nakig-inom diay kini sa amahan sa suspek.

"Wa ko makaila anang suspek kay tagsa ra man ko mogawas," pung sa asawa.

Si barangay captain Eddie Dicdican, kinsa nagsugilon sa nahitabo, nikanayon ang suspek nailhang mao si Jeffrey Estancia, 23, ug taga didto ra sa maong lugar.

"Kining gipatay nag-inom ni og tuba kuyog sa amahan anang suspek unya pagbayad niya nahibong siya nganong adunay naapil nga sigarilyo bali 10 pesos, so nagkalalis na sila kay di man manigarilyohay ning biktima," saysay ni Dicdican.

"Mao to nadunggan ning biktima nga giingnan ang amahan sa suspek nga patyon ta hinuon ka ani akong dala kay nagbibit man og bukog sa kabayo ang victim pero komedya ra god to," pung sa kapitan.

Ang anak sa kainom sa biktima gihulagway nga nipauli sa ilang balay ug sa pagbalik niini way pangutanang giduslak og kutsilyo ang liog ni Gacang.

Patay gilayon ang biktima human maigo ang ugat sa liog niini.

Wa na igkita sa lugar ang suspek kinsa gilayong nisibat padung sa wa matinong lugar.

"Ang among plano apilon gyud sa kaso ang amahan kay mao toy sinugdanan nganong nahitabo ang krimen," matud ni Dicdican.

Unang gibalhog sa Bansalan Police Station ang amahan sa suspek apan gibuhian sa kapulisan gumikan kay di siya maoy nagbuhat sa krimen.

Naguol kaayo ang asawa sa biktima sanglit siya ra ang ilang gisaligan sa duha niya ka anak aron sila mabuhi.

Nagbahad ang pamilya sa biktima nga ila gyud ipasaka ang kaso aron makab-ot ang hustisya. (Dondon Dinoy)