Lalaki napalgang patay

USA ka patay'ng lawas sa wa pa mailhing lalaki napalgang nagbuy-od didto sa may Purok 19, Barangay Ising, lungsod sa Carmen, Davao del Norte, Miyerkules sa buntag.

Sa report gikan sa Davao del Norte Police Provincial Office nasayran nga pasado alas 7:50 sa buntag napalgan na lamang ang patay'ng lawas sa maong biktima nga nagbuy-od ug daghang samad pinusilan sa kalawasan daplin sa sapa sa maong lugar.

Ang biktima gihulagway lamang nga anaa sa 22-25 anyos ang panuigon ug dunay tattoo sa tuong bukton.

Nagtuo ang mga otoridad nga igo lamang nga gilabay sa maong lugar ang biktima ug gipatay.

Posible sab nga dili taga didto ang biktima sanglit way bisan usa sa mga molupyo ang nakaila kaniya.

Patay'ng lawas sa biktima gihiluna na karon sa usa ka punerarya sa lungsod sa Carmen samtang gipaabot ang mga tagtungod nga moila kaniya.

Kapulisan sa lungsod sa Carmen mihimo na og pakisusi aron sa pag-ila sa nahisgutang biktima ug mga suspek nga mipatay kaniya. (Marvin Pineda)