Magtiayon gitulis; kapin P146 mil natangag

KAPIN P146 mil natangag gikan sa magtiayon human gitulis sa wala mailhing mga suspek sa siyudad sa Digos.

Sumala ni Police Officer 3 Eugenio Corbeta nga mga biktima bag-o lang naka-withdraw og kuwarta gikan sa Network Bank sa dihang nahitabo ang pagpanulis.

Giila ni Corbeta ang biktima nga usa ka Almer Bueron, 39, usa ka banana technician, nagpuyo sa Barangay San Miguel sa maong siyudad uban sa iyang asawa.

Mga biktima nagpatala sa among hitabo bandang alas 3:35 sa hapon niadtong Miyerkules.

Sumala pa nga human mag-withdraw og kuwarta sa bangko ang mga nahisgutan, misakay sila sa usa ka single motorsiklo aron mopauli.

Apan pag-abot nila sa dalang Camanchi sa Barangay Aurora Extension, kalit silang gitulis sa mga suspek nga gituohang nagsunod na kanila.

Matod ni Corbeta, armado sa di matinong kalibre sa armas ang mga suspek nga nanion sa nawong sa magtiayon.

Nagsakay og kolor blue ug itom nga motorsiklo ang mga suspek kinsa mipatid sa magtiayon, hinungdan sa pagkatumba sa ilang gisakyan nga motorsiklo.

Human nalimbuwad ang magtiayon, nakahigayon ang mga suspek sa pag-ilog sa bag nga gisudlan sa ilang kuwarta.

Natangag sa mga kriminal ang kantidad P146,732 ug dayon nanagan padung sa di na matinong lugar.

Mga suspek wa na maabti sa kapulisan apan padayon ang ilang gihimong imbestigasyon sa maong hitabo. (Dondon Dinoy)