Mga pari naghangyo pagtaral sa kaso sa masaker paspasan

GIHANGYO sa grupo sa mga kaparian ang gobyerno nga paspasan ang pagtaral sa kaso sa nahitabong masaker sa probinsiya sa Maguindanao.

Gikanayon ni Cotabato Auxiliary Bishop Jose Collin Bagaforo nga kinahanglan nga kalampagon ang korte sa sunod-sunod nga lihok protesta aron i-pursige nila ang pagtaral sa kaso sa mga tawo nga gilambigit sa masaker.

Halos usa na ka tuig ang milabay human nga gipangpatay ang 57 ka tawo sa Sitio Masalay, Barangay Salman, Ampatuan, Maguindanao niadtong Nobyembre 23, 2009.

Apan hangtud karon, dili pa klaro sa mga pamilya sa mga biktima nga makab-ot ang tinuod nga hustisya sa mangilngig nga krimen.

Nakighiusa ang mga obispo sa Maguindanao, North Cotabato, Sultan Kudarat, South Cotabato, Sarangani ug mga siyudad sa Heneral Santos, Koronadal, Tacurong, Kidapawan ug Cotabato nga nag-ampo nga masilutan na ang mga suspek nga dunay kalabutan sa masaker.

"Ang ating reflection diyan, sabi nga nila mahina man ang gulong ng hustisya, pero tayo ay nanalangin na ang hustiya ay makakamtan pa rin ng mga biktima at ng ating lipunan sa nangyari sa Maguinadanao massacre," pung pa ni Bagaforo.

Gi-angkon ni Bagaforo nga dunay mga pari ug obispo nga nadestino sa Maguindanao, Sultan Kudarat, North Cotabato ug Cotabato, ang nakadawat og hulga sa ilang kinabuhi gumikan sa ilang pagbatikos sa mga tawo nga dunay kalabutan sa masaker. (Edgardo Fuerzas)