NPA gilutos

GILUTOS karon ang mga rebeldeng sakop sa New People's Army (NPA) kinsa kauban sa upat ka mga napatay nga rebelde atol sa nahitabong engkwentro tali sa militar sa alas 7:00 sa buntag niadtong Martes.

Ang engkwentro nahitabo sa bukiron nga bahin sa Purok 9, Barangay Pasian, Monkayo, Compostela Valley Province.

Mga rebelde unang mirapido sa usa ka platoon ilawom sa 25th Infantry Battalion nga gipangulohan ni First Lieutenant Ryan Batchar.

Giingon nga ang pundok ni Batchar nagpalusad og security patrol sa bukiron nga lugar sa Barangay Pasian apan giunhan sila pagrapido sa mga NPA.

Si Batchar nagpahibalo nga wa matino nga gidaghanon sa mga sakop sa Front Committe 3 ang ilang gikapinusilay nga miabot sa 20 minutos nga pinusilay nga miresulta sa pagkamatay sa upat ka mga rebelde.

Misibog ang mga rebelde dihang nalupig sila sa pwersa sa militar ug ilang gibiyaan ang wa nay kinabuhi nga mga kaubanan.

Tulo dayon ang namatay human sa engkwentro ug sila giila sa pangalan nga alyas Isang, alyas Wendel, ug alyas Rambo nga pulos nakabaton og daghang samad sa kalawasan.

Dunay usa ka samaron nga babaye nga nailhan sa pangalan nga Tanya ang gisuwayan pagdala sa tambalanan apan tungod kay grabe ang iyang kahimtang, namatay siya.

Lima ka M16 rifle, usa ka Garand rifle, usa ka carbine rifle, land mine, ug mga subersibong dokumento nga gihuptan sa mga rebelde ang nahipus gikan sa nahitaboan sa engkwentro.

Nasayran nga nag-organisa ang mga rebelde sa utlanan sa Sta. Josefa, Agusan del Sur ug Monkayo, Compostela Valley mao nga miresponde ang militar nga miresulta sa binakbakay.

"The death of the NPA members could have been avoided if they did not join the NPA and engage in criminal acts. The 10ID will conduct operation whenever there is an imminent threat to the lives and economic activities of our people," ni 10th Infantry Divsion spokesperson Lieutenant Colonel Medel Aguilar sa iyang suwat pamahayag SuperBalita. (Alger Dura/Marvin Pineda)