Pag-umangkon ni Andal Sr. nasikop

USA sa mga pag-umangkon ni kanhi governor Datu Andal Ampatuan Sr. ang nadakpan sa alas 4:30 sa hapon niadtong Martes didto sa probinsiya sa Maguindanao.

Nailhan sa kapulisan ang suspek nga si Misuari Sinsuat Ampatuan, alyas Warren Sinsuat Ampatuan.

Gibutyag ni Maguindanao Police Provincial Director Marcelo Pintac nga nadakpan ang suspek sa Barangay Labo-Labo, Shariff Aguak sa diha nga nasiplatan sa mga sakop sa Criminal Investigation and Detection Group (CIDG-Armm) ug pwersa sa militar.

Si Ampatuan dunay patong sa ulo nga P250 mil sa diha nga gilambigit siya sa mangilngig nga masaker sa Maguindanao nga mikalas sa 57 ka kinabuhi, apil na ang 32 ka mga sakop sa lokal media didto sa Central Mindanao.

Gidugang ni CIDG-Armm Regional Director Jacinto Malinao nga si Ampatuan gidakop basi sa warrant of arrest nga giisyu ni Quezon City Regional Trial Court Branch 221 Judge Jocelyn Solis Reyes.

Gikalipay ni Maguindanao Governor Esmael "Toto" Mangudadatu ang gipalig-on nga operasyon sa militar ug kapulisan batok sa mga tawo nga gilambigit sa masaker.

Atol sa usa ka tuig nga anibersaryo sa Maguindanao massacre nanghinaut si Mangudadatu nga makab-ot na ang tinuod nga hustisya sa pamilya sa mga biktima sa niluog nga krimen ilalom sa administrasyon ni Pangulong Benigno Aquino III. (Edgardo Fuerzas)