Patay'ng lawas sa lalaki nakaplagan

USA ka gituohang miyembro sa Guardians Brotherhood Incorporated ang nakit-ang patay duol sa tulay sa sapa didto sa Bankerohan River sa Barangay Fishing Village, lungsod sa Malita, Davao del Sur.

Banda alas 7 sa buntag, niadtong Martes, nakurat na lamang ang mga lumolupyo sa maong lugar sa dihang nakaplagan ang patayng lawas sa usa ka lalaki ug dali nilang gitaho sa kapulisan.

Si Police Officer 3 Carlito Nailes, kinsa maoy misubay sa hitabo, nagkanayon nga wa pa sila makaila kinsa ang biktima nga gihulagway nga way sinina ug nagsul-ob og kolor itom nga pantalon.

Dugang ni Nailes nga ang biktima gibanabana nga dunay gitas-on nga 5 ka tiil ug upat ka pulgada samtang adunay tattoo nga Guardians ug inisyal nga "Go" sa tuong bahin sa iyang bukton.

Gumikan niini, gipahiling na sa mga otoridad ngadto sa ilang medico legal sa Malita Health Office ang patay'ng lawas sa biktima aron sutaon kon aduna bay "foul play" sa iyang kamatayon.

Kapulisan way nakitang samad sa lawas sa biktima mao nga naglibog pa sila sa motibo sa maong hitabo hangtud nga di pa mogawas ang resulta sa otopsiya. (Dondon Dinoy)