Pulis nga nanulis sikop

USA ka pulis kinsa wa pa makontento sa iyang sweldo ang nanulis apan nasikop sa kapulisan human sa makuting imbestigasyon niadtong Miyerkules.

Ang suspetsado mao si Police Officer 3 Reymund Mendoza, hamtong ang panuigon, nadestino sa Regional Public Safety Battalion (RPSB) ug nagpuyo sa Purok 10, Barangay Bucana, siyudad sa Davao.

Si Mendoza gisikop sa kapulisan sa alas 10:30 sa buntag niadtong Miyerkules human siya positibong giila sa iyang nabiktima nga si Joy Claro, 32, minyo, nagpuyo sa Barangay Indangan, ning siyudad.

Base sa inisyal nga imbestigasyon sa Sta. Ana Police Station, si Claro gitulis sa wa mailhing tawo sa alas 6:30 sa gabii niadtong Sabado didto sa Dacudao Avenue, distrito sa Agdao, ning siyudad.

Si Claro nagbutyag sa kapulisan nga samtang naglingkod siya sa usa ka coffee shop giduol siya sa usa ka armadong lalaki dayon gikuha ang iyang Neo laptop.

Ang biktima nagsulti nga gitionan siya og armas sa maong lalaki mao nga iyang gihatag ang iyang butang dayon miangkas ang suspek sa usa ka motorsiklo nga dunay plate number 1501-LL.

Tungod sa maong hitabo, ang biktima midangop sa kapulisan aron ipatala ang nahitabo kaniya ug sanglit iyang nakuha ang plate number sa motorsiklo, iyang gihatag ang maong plaka sa kapulisan kinsa nagsusi sab dayon sa Land Transportation Office (LTO) niadtong Lunes.

Nasayran sa kapulisan nga ang tag-iya sa motorsiklo usa ka babaye ug atua nagpuyo sa Purok 10, Barangay Bucana mao nga ilang gipanid-an sud sa duha ka adlaw.

Niadtong Miyerkules sa buntag, ilang nakita nga miguwa ang usa ka lalaki nga nagdala og laptop dayon misakay sa motorsiklo nga gigamit sa pagpanulis.

Sanglit nailhan siya sa biktima, gisikop dayon sa mga pulis nga naniid kaniya sa maong dapit dayon giposasan ug gidala sa Sta. Ana Police Station.

Ang tag-iya sa motorsiklo nagbutyag nga kanunay hulaman sa suspek ang iyang motorsiklo ug misalig siya tungod kay usa ka pulis si Mendoza.

Nakuha gikan kang Mendoza ang Neo laptop nga gipanag-iyahan ni Claro ug usa ka 9mm caliber pistol nga dunay serial number 620707.

Alas 3:00 sa hapon niadtong Miyerkules, si Police Officer 3 Ronald Osias, 39, minyo ug sakop sa Regional Public Safety Battalion nagsulti sa kapulisan nga iya ang armas nga nakuha gikan kang Mendoza.

Si Osias nagbutyag nga alas 2:00 sa hapon niadtong Sabado, nahanaw ang iyang service firearm nga .9mm caliber pistol nga gisulod sa iyang cabinet didto sa ilang headquarters.

Giingon nga nasiplatan si Mendoza ni PO2 Recla nga misulod sa kwarto ni Osias ug iyang gikuha ang armas niini dayon misakay og motorsiklo paingon sa wa masayri nga lugar.

Ang maong armas mao sab ang gigamit ni Mendoza sa iyang pagpanulis niadtong adlawa.

Si Police Senior Inspector Ronald Lao nagbutyag sa Superbalita nga ila nang gipasaka ang kasong attempted robbery, theft, robbery ug illegal possession of firearms didto sa City Prosecutor’s Office.

Gisuwayan paghinabi sa Superbalita ang suspek kagahapon apan wa mitugot ang pulis nga makuha ang iyang pahayag bahin sa iyang gihimong pagpanulis.

Gihuwat karon sa suspek kung kanus-a taralon ang iyang kaso sa korte ubos sa kabalaka nga siya mataktak sa serbisyo. (Alger Dura)