Suspek sa lugos nasikop sa pulis

USA ka lalaking suspek sa paglugos sa usa ka babayeng gituohang dunay deperensya sa pangisip nasikop sa mga sakop sa kapulisan didto sa Barangay San Vincete siyudad sa Davao, Miyerkules sa buntag.

Nailhan ang suspek nga mao si Ruben Cruspero, hamtung ang panuigon, molupyo sa Purok 1, Barangay San Vicente, siyudad sa Panabo.

Sumala pa ni Police Officer 2 Fainar sa Women's and Children's Protection Desk sa Panabo City Police Station nasayran nga pasado alas 9:00 sa buntag nasikop sa mga sakop sa kapulisan ang suspek didto sa maong lugar.

Si Cruspero gitudlong milugos sa iyang silingan nga si alyas Babe, hamtung ang panuigon ug gituohang dunay deperensya sa pangisip.

Pasado alas 7:00 matud pa sa gabii niadtong Martes sa dihang nanguha og kawayan ang biktima didto sa maong lugar aron himuon niyang dulaan.

Nakit-an siya sa suspek ug didto gipahimuslan ang iyang pagkababaye.

Wa na kahimo sa pagsukol ang biktima hinungdan nga milampos gayud ang suspek sa iyang dautang tinguha.

Uban ang iyang mga ginikanan midangop sa buhatan sa kapulisan ang maong biktima aron sa pagpasikop sa suspek.

Gilayong mihimo og pagresponde ang kapulisan ug ilang nasikop ang suspek didto mismo sa iyang balay.

Hinuon, wa gilimod sa suspek ang pasangil ug matud pa niya nahimo niya ang krimen tungod lango siya sa makahubog nga ilimnon.

Migawas sab sa resulta sa gihimong medical examination ngadto sa biktima nga gihilabtan siya sa suspek.

Gitanggong dayon sulod sa selda ang suspek samtang kasong lugos gihikay na sa kapulisan batok kaniya. (Marvin Pineda)