Tag-iya sa armas gigamit sa kagawad retirado nga pulis

USA diay ka retiradong pulis ang tag-iya sa armas nga gigamit sa barangay kagawad kinsa nagpusil patay sa kapitan didto sa Barangay Demoloc, lungsod sa Malita, Davao del Sur.

Si Senior Supt. Ronald dela Rosa, provincial director sa Davao del Sur Provincial Police Office, nagkanayon nga si Rogelio Mariano, kinsa maoy giingong tag-iya sa armas nga gigamit ni Barangay Kagawad Leonardo Laingo nga mipusil patay kang Barangay Kapitan Clara Balliota, usa retiradong sakop sa Philippine National Police niadtong Nobyembre 24, 2009.

Si Mariano, kinsa lumolupyo sa Edsa Street, Barangay Poblacion sa maong lungsod, gi-imbitahan sa mga pulis sa ilang buhatan niadtong Lunes aron mohatag og katin-awan bahin sa maong armas.

Kahinumdoman nga nasubay sa kapulisan nga si Mariano maoy tag-iya sa Taurus nga matang sa kalibre .45 nga pistola nga gigamit ni Laingo sa pagpatay kang Balliota sud mismo sa barangay hall niadtong milabay'ng Biyernes.

Human napatay ang kapitan, si Laingo nagpusil sab sa iyang kaugalingon. 

Giangkon ni Mariano ngadto sa kapulisan nga siya maoy tag-iya sa armas apan iya na matud pang gibaligya ngadto sa kagawad ang pusil sa kantidad nga P30 mil niadto pang Nobyembre 5, 2010.

Sumala ni Mariano nga nagkinahanglan siya og kuwarta niadtong higayona alang sa medikasyon sa iyang sakit nga diabetes.

"He promised to present the deed of sale of the said firearm as soon as possible," butyag ni dela Rosa.
Hinuon gikanayon ni dela Rosa nga gimando pa niya sa iyang ginsakpan ang lawom pa nga imbestigasyon bahin niini. 

"Malita police is further conducting follow-up investigation on said incident to determine the extent of liability of retired SPO3 Mariano and filing of charges when possible," panapos nga pahayag ni dela Rosa. (DD)