Taga-Davao Oriental naghikog

PATAY nang napalgan ang usa ka estudyante kinsa naghikog sulod sa iyang lawak sa alas 5:00 sa gabii niadtong Martes.

Ang biktima mao si Alma (bansagon gitago sa Superbalita), 22, nagtungha sa Interface Computer College, lumad nga taga Manay, Davao Oriental ug nagpuyo sa San Nicolas, Barangay Buhangin, siyudad sa Davao.

Si Senior Police Officer 1 Samuel Gilay sa Buhangin Police Station nagbutyag sa iyang spot report nga ang biktima napalgan ni Dionisio Valles, 60, nga nagbitay na sulod sa lawak ang dalaga.

Ang biktima giingon nga migamit og bakus sa iyang paghikog dihang giugkat ang iyang patay'ng lawas sa mga sakop sa Scene of the Crime Operatives (Soco).

Si Daisy, iyaan sa biktima, nagbutyag sa kapulisan nga niadtong Sabado gikalalis sa biktima ang iyang anak babaye tungod sa tabi nga ang biktima usa ka “Tomboy”.

Sukad niadtong adlawa, suma ni Daisy, milakaw ang iyang anak nga babaye ug didto natulog sa balay sa iyang classmate.

Wa magdahum ang kabanay sa biktima nga magpakamatay siya tungod laman sa maong hitabo.

Mga sakop sa Soco nagbutyag nga way timailhan nga gituyo ang kamatayon sa biktima, apan ang kapulisan sa Buhangin mohimo gihapon og makuting imbestigasyon.

Ang biktima atua karon gihaya sa Rivera Funeral Homes. (AD)