Tomboy gipatay

USA ka tomboy ang gipusil patay sa alas 7:45 sa gabii niadtong Sabado didto sa probinsiya sa Cotabato.

Nailhan sa kapulisan ang biktima nga si Tarhata Maulana, 41, ug molupyo sa Sitio Lumayong, Barangay Kayaga, Kabacan.

Sigun sa taho gikan sa Cotabato Police Provincial Office, nasayran nga samtang nakig-istorya ang biktima sa iyang kaila sa Purok Crislam, Barangay Poblacion, kalit lang mibutho ang duha ka wala mailhing tawo ug gipusil siya gamit ang kalibre .45 nga pistola.

Patay gilayon si Maulana nga naigo sa iyang tangkugo ug tiyan samtang ang mga suspetsado abtik nga miipsot sakay sa DT Yamaha nga motorsiklo paingon sa siyudad sa Kidapawan.

Gilutos pa sa mga pulis nga gipangulohan ni Kabacan Deputy Chief of Police Senior Inspector Joan Ressurrecion ang mga mamumuno apan wala na gyud kini maabtan.

Dunay nagtuo nga posibling giihaw ang biktima sa nagpailang Cotabato Death Squad gumikan kanhi na kining nalambigit sa pagpayuhot sa ginadiling druga.

Apan hangtud karon pabilin pa nga nag-imbestiga ang kapulisan sa tinuod nga motibo sa pagpatay kang Maulana. (EF)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph