Vendor gipusil

BISAN gipatuman sa kapulisan ang total gun ban, apan way kahadlok ang usa ka suspetsado nga nagbitbit og armas nga iyang gigamit sa pagpusil sa usa ka fruit vendor sa ala 1:30 sa kaadlawon kagahapon didto sa Magallanes Extension ug Marfori Street, Bankerohan, siyudad sa Davao.

Gipusil mao si Janryll Camasin, 21, ulitawo ug nagpuyo sa Pag-asa, Bankerohan, sigun sa imbestigasyon ni Police Officer 3 Sherwin Abrania sa San Pedro Police Station.

Post your reaction to the Manila hostage crisis

Si Abrania miresponde dihang nakadawat og police assistance gikan sa security guard sa Davao Doctors Hospital kinsa nagpahibalo nga dunay biktima sa pagpamusil nga midangat sa maong tambalanan.

Didto na sa tambalanan nasayran sa kapulisan nga gipusil ang biktima samtang nagpaabot og customer sa fruit stand nga gipanag-iyahan sa apohan ni Camasin.

Si Jinclod, 14, nagbutyag sa kapulisan nga kalit giduol sa tulo ka mga wa mailhing tawo ang iyang igsuon dayon gipusil sa wa matino nga kalibre sa armas tumong sa iyang dalunggan.

Mga suspetsado, suma ni Jinclod, daling mibiya sa maong lugar hinungdan nga iyang gidala ang biktima didto sa DDH apan gibalhin sab dayon didto sa Southern Philippines Medical Center (SPMC).

Samtang giimbestigahan sa kapulisan ang maong hitabo, dunay nakasulti nga ang mipusil sa biktima nadunggaban sa wa pa mailhing tawo ug atua sa SPMC.

Si Arbania nagsusi dayon sa maong tambalanan ug didto positibong giila sa igsuon sa biktima nga ang tawo nga gitambalan sa SPMC mao ang tawo nga mipusil kang Camasin.

Base sa medical record, ang suspetsado giila nga mao si Ernesto del Rosario, alyas Wingwing, 19, ug nagpuyo sa Pag-asa Bankerohan.

Sanglit gitambalan pa siya sa mga doktor, gibantayan siya ni Police Officer 3 Albino Tagoy aron di makaikyas ug kung makagawas na sa hospital dalahon siya sa San Pedro Police Station alang sa makuting imbestigasyon. (Alger Dura)