Welder nahaybol, patay

WALA damha sa usa ka welder nga mahaybol sa motorsiklo nga maoy hinungdan sa iyang kamatayon didto sa Km. 71, Barangay Sinawilan, sakop sa lungsod sa Matanao, Davao del Sur niadtong Miyerkules sa hapon.

Ang imbistigador sa trapiko nga si Police Officer 3 Zerxes Von Wycliff Famor nagbutyag nga banda alas 5:30 sa hapon sa maong adlaw, usa ka kolor pula nga Motor Star, nagbaton sa plakang LF-7347 nga nakarehistro sa ngan ni Adoracion Neri, apan gimaneho ni Eleuterio Tubo nahaybol.

Nasayran nga si Tubo, 54, minyo ug lumolupyo sa Barangay Bacungan, sakop sa lungsod sa Magsaysay, Davao del Sur, nagmaneho sa motor nga way lisensiya.

Angkas niya ang usa ka Sammy Recopelacion, 31, minyo ug mag-uuma sa nahisgutang dapit.

Ang mga nahisgutan gikan sa siyudad sa Digos ug padung unta nga mopauli.

Apan sumala ni Recopelacion kinsa naangol sa maong insidente, nga iyang namatikdan nga kalit lang migahi ang lawas ni Tubo samtang nagdagan ang motorsiklo.

Nakahimo pa sa pagpreno si Tubo apan natumba ug nilahos na sila sa pagkabalintong sa kanal.

Nawad-an sa panimuot si Tubo sa dihang gidala kini sa Sinawilan Clinic and Hospital.

Apan si Dr. Jose Adlawan nga maoy nag-atiman sa biktima nagsulti nga hikabsan na siya sa kinabuhi.

Gidala na ang patay'ng lawas sa biktima didto sa Collado Funeral Home sa silingang lungsod sa Bansalan, Davao del Sur.

Nagtuo ang mga pulis nga giatake sa “hypertension” ang biktima hinungdan nga nahaybol.

Sa pikas bahin, usa ka puya ang nakit-an human gilabay didto sa Sitio Patulangon, Barangay Zone 1, lungsod sa Sta. Cruz, Davao del Sur.

Banda alas 9:30 sa buntag, Huwebes, gitaho sa kapulisan ang puya nga gi-abandona sa wa mailhing inahan.

Ang kapulisan human masayod sa insidente nagdali pag-adto sa maong lugar ug sila na ang nagdala puya ngadto sa kapilya sa Gigmay'ng Kristohanong Katilingban (GKK) sa nahisgutang dapit aron nga bendisyonan.

Human sa hamubong pag-ampo sa kapilya, gilubong gilayon ang puya sa usa ka pampublikong sementeryo sa maong lungsod.

Padayon pang nagsusi ang kapulisan aron nga masayran kon kinsa ang inahan ang naglabay sa puya. (Dondon Dinoy)