Roldan: Tubag ba ang giyera?

Saturday, October 29, 2011

"MATA sa mata. Ngipon sa ngipon. Pulpugon nato silang tanan!" Mao kini ang atong madungog nga komentaryo sa katawhan sa Davao ug sa Manila human sa bahug-bahog didto sa Basilan, Zamboanga Sibugay ug Lanao del Sur tali sa Armed Forces of the Philippines (AFP) ug sa Moro Islamic Liberation Front (MILF). Mao daw kini ang tubag sa Mindanao problem. Apan unsa ang pangutana?

Sa tinuod makalilisang ang nahitabo diin 19 sa mga sundalo, kadaghanan kanila nga bagito ug gikan pa sa eskuwela nga gipasungag sa bagtikan nga manggugubat sa MILF sa ilang teritoryo. Nahitabo kini sa panahon nga gihaon na unta ang gidamgo natong peace talks nga mosulbad sa dugay nang problema sa kalinaw.

Have something to report? Tell us in text, photos or videos.

Si Congressman Rodolfo Biazon nga kanhi hepe sa marines dinhi sa Davao niadtong 1990s nisugyot nga ibasura ang peace talks ug giyerahon na dayon sila sa Basilan. Si Senador Trillianes usab nibatikos sa AFP sa sipyat niini ug nagbahad og imbestigasyon sa senado. Samtang si Senador Juan Ponce Enrile ug Bise Presidente Jojo Binay nibutyag nga ilang ipa-review ang peace talks ug lutuson ang mga rebelde.

Si kanhi presidente Joseph "Erap" Estrada nga kanhi nideklara og all-out war sa MILF sa Maguindanao kaniadto nisugyot usab nga magdeklara og susamang lakang si P-Noy.

Sa laing bahin, daghan sab nga mga tawo ang nidapig sa panawagang all out war sa mga militarista diha sa kagamhanan karon. Sa usa ka TV text-based poll nga ang kadaghanang nitubag kay taga Metro Manila pod, niuyon nga giyerahon na ang Mindanao.

Para kanako, delikado ug iresponsable ang maong poll survey nga gawas nga unscientific makapasamot pa hinuon sa away imbis nga makatabang sa pagsulbad. Ug tuod man, sakto ko tungod kay daghang peace advocates sa tibuok Pilipinas nga nibatikos sa maong survey sa TV nga mahimo unyang panggubatan ang tibuok Mindanao.

Unsa mo sa Luzon, masuwerte? Usa ka multi-sectoral peace group sa Basilan nga beterano na sa mga giyera nitiyabaw nga dili lalim ang magkagiyera. Gawas nga daghang mga kinabuhi nga makalas, dili kini solusyon sa padayong nagkagidlay nga sitwasyon sa ordinaryong katawhan. Kita nga diri nanimuyo sa Mindanao ilabi na sa mga gubot nga dapit nakahibalo sa grabeng kapait sa kinabuhi. Unsa na kaha kung may all out war pa? Mosamot ang kabusluton sa purol ni Budoy? Dili nato makaya ang lain pang hugna sa kagubot. Hasta sab ang gobyerno wala nay kuwarta nga igasto sa bala, bomba, materyales sa gubat ug pangbayad sa pagpalubong sa mga sundalong nakalas.

Busa usa ako sa nalipay nga wa paminawa ni P-Noy ang sugyot sa all out war ug mibarug kini sa malinawong pagsulbad sa problema sa Mindanao. Hayan nga mopadayon ang peace talk bisan pa man kon may susamang babag sa iyang dalan.

Tungod niini, ang kasaysayan sa Pilipinas dili moila kang P-Noy nga bantugang manggugubat nga Pilipino, hinunua ilhon siya nga banggiitang pangulo sa kalinaw sa Pilipinas.

Ang bola anaa na karon sa kamot sa peace panels sa GPH ug sa MILF. Unta motabang kita sa pag-ampo nga madayon ang peace talks dili lang sa dinhi sa Mindanao kon dili sa tibuok nasud ug apil na ang CPP/NPA.