Donaire ngadto ni Vazquez: Way batasan!

Tuesday, February 7, 2012

HUMAN makoronahi isip World Boxing Organization super bantamweight champion, gibirahan karon ni Nonito "The Filipino Flash" Donaire ang pagka-way batasan sa Puerto Rican boxer Wilfredo Vazquez Jr, nga iyang gipildi niadtong Dominggo.

Bisan mipakitag respeto si Vazquez ngadto ni Donaire atol sa away, apan atol sa ilang weigh-in diriyot sila magkabangi.

Have something to report? Tell us in text, photos or videos.

Gipikhan ni Vazquez ang suot nga kalo ni Donaire, nga gibawsan sab sa Pinoy.

Init nga pahayag sab ang gibuhian nila sa usag-usa, apan maayo na lamang napugngan sila sa tagsa-tagsa nila ka handlers.

Niadtong Dominggo, napildi ni Donaire si Vazquez pinaagi sa split decision, diin human sa away, miduol kaniya ang Puerto Rican fighter.

"Sabi n'ya, business lang to. May respecto ako sa 'yo, gusto ko lang ma-excite ang fans," ni Donaire.

"Okay, whatever. Wala na akong respeto sa 'yo kasi, not only you disrespected my country, not only you disrespected my wife and my team, you disrespected boxing as well," dugang sa Pinoy ngadto kang Vazquez.

"Whatever, wala na akong pakialam sa 'yo. Basta ang alam ko panalo ako, world champion ako."

Kun may giyera sila Donaire ug Vazquez, may word war sab ang asawa ni Donaire ug ni Vazquez pinaagi sa Twitter.

Naangol ang wala nga kamot ni Donaire sa sayong bahin sa duwa, apan milampus gihapon siya, gidomina ang langyaw.

Ang duha ka hukom mihatag ni Donaire og 117-110 nga iskor samtang ang usa mihatag kang Vazquez ug 115-112.

Public apology

Bisan nangayo na og sorry ang kampo ni Vazquez Jr., apan alang ni Donaire Jr., dili pa kini paigo.

Suma ni Donaire nga kun sinsero pa Vazquez sa pagpangayo niyag pasaylo, mas maayong himuon niya kini atubangan sa publiko.

Miinit ang ulo ni Donaire ngadto ni Vazquez human siya gitawag niini nga talawan, giapil pag saway ang iyang misis nga si Rachel, lakip ang Pilipinas.