Manny Pacquiao: Mobawi ta

MISMO si pound-for-pound king ug Sarangani Rep. Manny Pacquiao na ang mipugong sa init nga ulo sa iyang mga fans nga padayon nga nagprotesta sa makadismaya nga resulta sa away batok kang undefeated boxer Timothy Bradley.

Matud ni Pacquiao, kasabot siya sa mga gibati apan ang importante ipakita gihapon ang professionalism ug pagrespeto sa desisyon sa mga hurado.

Nagpasalamat sab si Pacman sa mga nag-ampo alang kaniya ug sa mga padayon nga nagtuo ngadto sa iyang abilidad.

Dugang sa Pinoy boxing superstar, dunay rematch man sab mahitabo aron ipakita nga siya god ang midaug.

Iyang gipaneguro nga sa sunod nilang pagkita mobawi siya og maayo.

Sa pagkakaron, dunay 'peace of mind' matud pa siya ug nanghinaut nga kini sab ang mabati sa iyang mga fans.

Dako ang pagtuo ni Pacquiao nga dunay mas lalom nga hinungdan ang iyang pagkapildi.

Matud ni Pacman, mas misamot ang iyang pagsalig sa Ginoo tungod kahibalo siya nga pagsulay kini ngadto niya.

Malipayon gihapon siya sa iyang away ug napakita sa tanan nga mga Pinoy nga morespeto sa unsa man nga desisyon sa mga hurado.

Bisan ang pamilya Pacquiao, dawat na ang nahimong resulta sa away.

Kini sab ang pahayag ni Jinkee Pacquiao.

Matud niya, bisan nakahilak siya dihang nahibal-an nga di pabor sa iyang bana ang desisyon, apan dali niya kining nadawat.

Bisan ang ilang mga anak, wa sab nagdumot tungod sa positibong aspeto na lang sila nagatan-aw.

Kahibalo sila sa ilang kaugalingon nga ang ilang amahan ang tinuod nga midaug.