Suter, Rubio, Magbanua, ug Bongato sulod sa Davraa 2017 | SunStar

Suter, Rubio, Magbanua, ug Bongato sulod sa Davraa 2017

Time to read
1 minute
Read so far

Suter, Rubio, Magbanua, ug Bongato sulod sa Davraa 2017

Saturday, November 11, 2017

SILA Nathalie Suter, Marv Denzel Rubio, Blanche Ellyz Bongato, ug Wesley Jovan Magbanua ang midomina sa ilang tagsa-tagsa ka dibisyon sa Standard Chess Tournament sa Davao City Athletic Association (DCAA) Meet 2017 sa Davao City National High School - Senior High School Building niadtong Huwebes sa hapon.

Malampuson nga nasungkit ni Suter, 11 anyos, grade 5 nga pambato sa Doña Pilar Learning Center ang iyang unang bulawang medalya sa torneyo alang sa elementary girl kategorya nga mitala og 4.5 puntos human sa lima ka round Swiss System Format.

Kini ang ika-duhang higayon nga pakigtigi ni Nathalie kinsa mibandera sa Unit VIII ug nanguna siya karong tuiga diin gipalukapa niya sila Leane Faith Salajudin sa Unit III (4 puntos) ug Caerel Shane Mantilla sa Unit V (3.5 puntos) nga nabutang sa ikaduha ug ikatulong puwesto sa maong han-ay.

Samtang si Rubio maoy mihari sa elementary boys alang sa Unit Vi nga mihimo og 4.5 puntos aron mapildi sila Ryan Gabriel Rasay sa Unit III ug Joshua Rem Balmori sa Unit VIII nga parehong 4 puntos alang sa sunod duha ka puwesto.

Sa secondary girls, si Bongato sa Unit VI ang nanguna human miiskor og 4.5 puntos batok Irish Yngayo pambato sa Unit VIII nga mihimo og 4 puntos samtang ikatulo si Honey Grace Buenafe sa Unit V nga 4 puntos.

Samtang sa secondary boys, nabulsa ni beteranong Magbanua ang titulo alang sa Unit V nga mitala og perpektong iskor nga 5 puntos batok ni Eric Yngayo Jr sa Unit III nga 4 puntos ug Kurt John Placencia sa Unit 1 nga dunay 3.5 puntos alang sa sunod duha ka puwesto.

Tungod sa kadaugan, sila Suter, Rubio, Magbanua, ug Bongato abante sa Davao Region Athletic Association 2017 nga himuon dinhi sa siyudad sa Davao. (Marizz S. Robilla)

Gipatik sa mantalaang Superbalita Davao Nobyembre 11, 2017.

View Comments