Mga 'Hiyas sa Kadayawan 2012' ila-ilahon ta! (Una sa lima ka guwa)

MADAYAW! Mabulukon na kaayo ang siyudad. Puno sa nagkadaiyang kolor sa buntings, inubanan sab sa mga kalihukan bisan asang suok ning dakbayan.

Ang termino nga "kadayawan" gikan sa pinulungan sa Mandaya nga d “madayaw,” usa ka timbaya.

Niadtong 1970s, si Mayor Elias B. Lopez, usa ka Bagobo, nanguna sa usa ka tribal festivals nga nag-feature sa mga lumad ug tribung Muslim sa dakbayan nga nagpakita sa ilang sayaw, ritwal ug pasalamat.

Samtang 1986, ang programa gitawag na nilang "Unlad Proyekto Davao" nga nagtumong sa paghiusa sa Dabawenyos human sa Martial Law.

Sa maong panahon, ang kalihukan gitawag nga "Apo Duwaling," gikan sa famous icons sa Davao: ang Mt. Apo, durian ug waling-waling.

Hangtud nga 1988, ang kanhi mayor ug karon bise mayor Rodrigo Duterte mihulip sa ngalan niini ngadto sa "Kadayawan sa Dabaw" nga magsaulog sa abunda nga ani sa bulak, prutas ug uban pang produkto.

Sa pagpanglabay sa panahon, daghang kalihukan ang nadugang, usa na dinhi ang Hiyas sa Kadayawan.

Ikatulo ka tuig na karon nga gihimo ang Hiyas, diin ang mga representante gikan sa napulo ka tribu sa dakbayan.

Sa tema nga 10 tribes, Onve Vibe. Tumong niini nga magkahiusa ang mga tawo dinhi, unsa man ang iyang kultura, kagikan o pagtuo.

Ang napulo ka tribu Ata, Matigsalug, Ovu-Manuvo, Klata-Djangan, Tagabawa, Tausog, Maguindanao, Maranao, Kagan, and Sama.

Sugod karong adlawa, atong ila-ilahon ang nagkadaiyang “Hiyas” nga representante sa ilang tribu, nagsilbi nga tingog sa ilang hut-ong.

Garbo sa tribung Ata, si Emierita A. Bogcal. Si Mimi nga taga-Crossing Malabog, Paquibato District ning siyudad anaa sa ikatulong tuig sa kursong Bachelor of Elementary Education sa Holy Child College of Davao. Siya anak nila Edgardo M. Bogcal Sr ug Gundina.

Sa edad nga 23-anyos, damgo ni Mimi nga mahimong usa ka magtutudlo.

Ang pag-biyahe sa kalibutan ang dream sa pambato sa tribung Maguindanaon nga si Jean K. Ali.

Naila sab nga Baby Jean, siya anaa na sa ikaduhang tuig sa kursong BS Tourism sa Joji Ilagan Career Center Foundation.

Si Baby Jean, proud daughter nila Sukarno ug Monera Ali.

Ang talent night sa Hiyas himuon karong Agosto 15 sa Gaisano Mall of Davao. Samtang ang finals sa Davao City Recreation Center (DCRC) kanhi Almendras Gym, karong Agosto 17. (Rhona O. Goc-ong)