Mga 'Hiyas sa Kadayawan 2012' ila-ilahon ta!

(Ikatulo sa lima ka mga guwa)

GITAWAG nga festival of festivals, ang pinaka-grandiyoso nga selebrasyon sa Mindanao.

Gilauman nga modagsa na sab ang mga turista, lokal man o langyaw sa kasaulugan sa 27th Kadayawan Festival.

Uban sa tema nga "Ten Tribe, One Vibe," ang nagkadaiyang kalihukan karon nagpakita sa cultural heritage nga ania dinhi sa siyudad.

Dinhi malinawon nga nanimuyo ang napulo ka tribu, ang Matigsalog, Tausug, Obu Manuvu, Maguindanaon, Bagobo Tagabawa, Sama, Bagobo Klata, Maranao, Ata ug Kagan.

Usa sa giatangan nga kalihukan matag Kadayawan mao ang Indak-Indak sa Kadalanan (Street Dancing Competition) karong Agosto 18. Diin karon nga tuig salmutan kini sa 21 ka grupo.

Suma pa nga dili lamang kini ordinaryo nga kompetisyon sa sayaw, tungod makita sab dinhi ang cultural dances sa matag tribu, naghulagway kini sa ilang panginabuhi lakip na sa way kamatayan nila nga musika.

Gikahinaman na sab ang Floral Float Parade karong Agosto 19, nga magpakita sa dagku ug gagmay nga floats nga gidayan-dayanan sa mabulukong buwak.

Kini mosubay sa nag-unang kadalanan ning siyudad, diin may mga artista gikan kauluhan ang makigduyog, lakip na ang mga Hiyas sa Kadayawan.

Una ako malimot, atangi gyud ang finals sa Hiyas sa Kadayawan 2012 karong Agosto 17 diha sa Davao City Recreation Center, alas siyete sa gabii.

Si Belle Colleen Bato, 20-anyos, maoy morepresenta sa Bagobo-Clata tribe. Natapos niya ang kursong BS in Agricultural Business sa University of the Southeastern Philippines sa Mintal. Sa atong pagduki-duki, ang Clata kabahin sa Manobo tribe.

Ang 26-anyos nga si Elmia Hussin Sailadin sab ang modala sa tingog sa tribung Sama. Si Elmia nakatapos sa kursong BS in Business Administration sa University of Mindanao. Naila sab sa tawag nga "Matet" damgo niya nga mahimong front cover sa usa ka magazine, mahimong usa sa 'most influential person' sa kalibutan.