MOTABANG na ang World Boxing Council (WBC) aron mahinayon ang mega fight tali nila Manny Pacquiao ug Floyd Mayweather.
Sumala ni WBC President Mauricio Sulaiman, kinahanglan na mahitabo ang away sa duha ka banggiitang boksingero tungod kini matud pa ang gustong makita sa world boxing fans.
Apan gipahibalo ni Sulaiman nga di mahimong madali ang pagpaplantsa sa match-up sa undefeated American boxer ug sa eight division world champion.
Gipaneguro sa WBC president nga himuon nila ang tanan sa ilang makaya aron makatabang sa giatngan nga Pacquiao-Mayweather fight sa tuig 2015.
Mitubag na sab si Manny sa pagsungog na sab sa social media ni Floyd Jr.
Sumala ni Pacquiao, kung sa tan-aw ni Mayweather nga paspas siya patulugon sa ring kay dapat na moatubang ug motubag na kini nga gidawat na niya ang hagit.
"Pinost niya, dapat lumaban na siya. Madali pala akong patulugin eh," ni Pacman.
Sayo niini, nag-post si Mayweather og usa ka video sa iyang official Instagram ug Facebook account nga nagpapakita kung giunsa pagkatumba si Pacquiao sa kamot sa Mexican boxer nga si Juan Manuel Marquez.
Ang maong video kay milungtad og 16-segundos diin may background music nga "Another One Bites the Dust" sa banda nga Queen.