TAmbagi Ko Noy Tikyo: Way gisugot | SunStar

TAmbagi Ko Noy Tikyo: Way gisugot

Time to read
1 minute
Read so far

TAmbagi Ko Noy Tikyo: Way gisugot

Wednesday, September 13, 2017

DEAR Noy Tikyo,

Tagoa ko sa ngan nga Ms. Pisces, 18 anyos.

Nagproblema ko kay dunay duha ka mga lalaki nga nanguyab nako.

Si Jipjip maoy akong childhood friend. Gagmay pa mi, kami na gyud ang magkakuyog kanunay. Kon walay klase, manuroy mi uban sa among ubang mga friends.

Tungod sa among pagkasuod ni Jipjip, daghan ang nagtuo nga uyab na mi, ilabi na karon nga nag-college na mi. Apan sa pagkatinuod, inigsuon ra ang ako para niya.

Apan nahibulong na lang ko kay niadtong Agosto nanguyab siya nako kay matud niya di daw siya buot nga mahiadto ko sa lain. Iya diay nasayran nga nanguyab nako ang akong classmate nga si Ricky. Grabe diay ang iyang selos kang Ricky hinungdan sa iyang kasuko.

Ang akong gibuhat, wa koy gisugot kay wala man pod koy gugma nilang duha. Ug sukad adto, di na ko ganahan motagad ni Jipjip, tungod niini.

Karon mga babaye na lang akong kuyogan kay di ko gusto og samok, ilabi na bahin sa gugma. Kay tinguha ko gyud nga makatapus sa akong pag-eskuwela.

MS. PISCES

*****

Ms. Pisces,

Tinuod makatapus gyud ka og eskuwela kon duna kay determinasyon sa kaugalingon. Ug nakita ko kini kanimo kay wa ka man gyud magpadala niining gugma-gugma.

Maayo nga wa ka una misulod og seryusong relasyon kay usahay mao baya ni ang hinungdan nga di makahuman og eskuwela. Kay ang kalampusan mag-agad ra gyud na sa imong kaugalingon.

Kon maoy imong paagi nga, for the meantime, mga babaye una ang imong kuyogan, mintras nga wala ka pa makatapus, naa ra na nimo. Imo man ning katungod.

Apan mas maayo pod seguro nga di sab nimo likayan ang mga lalaki kay di man tanang higayon, babaye ra ang imong kuyogan.

Mas nindot gani nga imbis nga di nimo tagdon si Jipjip, imo siyang istoryahan. At least pinaagi niini, imong mapasabot ang tinuod mong pagbati ngadto niya nga inigsuon ra ang imong pagtratar niya ug wala nay lain.

Kay kahibawo kong madawat ra niya nga wa kay espesyal nga pagbati pag-abot sa saktong panahon.

NOY TIKYO

Gipatik sa mantalaang Superbalita Davao Septembre 14, 2017.

View Comments