Tambagi Ko Noy Tikyo: Gipugngan | SunStar

Tambagi Ko Noy Tikyo: Gipugngan

Time to read
1 minute
Read so far

Tambagi Ko Noy Tikyo: Gipugngan

Monday, February 12, 2018

DEAR Noy Tikyo,

Tawga lang ko og James, 31 years old, loveless. Nagkabuwag mi sa akong uyab usa na ka tuig ang nakalabay. Apan di kini maoy akong problema. Ang akong problema karon kabahin sa subling pagpitik sa akong kasingkasing ngadto sa usa ka binuhat.

Naa koy higala karon nga babaye. Nahimo ko siyang friend tungod sa wala damhang panghitabo nga nagkahimamatay mi sa usa ka mall ning siyudad.
At first, wala lang nako to gitagad. Apan natingala na lang ko kay iya kong gi-add sa iyang Facebook.

Didto na nagsugod ang among panagsuod. Mo-share na sab siya sa iyang mga problema sa iyang life diri nako.

Actually single parent. Duna siyay kapuyo kaniadto ug nakabaton og usa ka buok anak.

Sa taud-taod namong panaghigala, na-feel na nako nga naa siyay pagbati ngari nako samtang ako duna na say gibati ngadto niya. Apan ako lang ning gipugngan kay basi'g masakitan lang unya ko sama sa miagi kong hinigugma.

Apan kanunay na siyang naa sa akong hunahuna. Unsa ang angay nakong buhaton? Ako ba siyang sultihan o ihilom ko na lang ang akong gibati para niya?

James

***

James,

Nganong imo man nga pugngan ang imong gibati kon siya ang gipitik sa imong kasingkasing? Timan-i mas masakitan ka kon imong palabyon ang higayon nga unta gihatag na man kanimo sa Ginoo.

Para nako, wala bayay babag kon magkarelasyon mong duha. Una, bisan tuod kon duna siyay anak, apan wala pa siya mahigot sa salag sa kaminyuon. Kay kadtong amahan sa iyang anak, kapuyo ra man to niya. Wala man sila makasal. Samtang ikaw, ulitawo ka pa man ug gawasnon pa kaayong makapangita og babaye nga iuban sa altar sa kaminyuon.

Ang tanan mag-agad ra gyud sa inyong mga desisyon. Kon di mo siya pangulitawhan karon, unsaon man nimo pagkahibawo nga kanang imong nakitang pagbati niya tinud-anay alang nimo?

As long as, nadawat na nimo ang iyang pagkatawo ug ang iyang kagahapon, wa ka nay angay nga ikahadlok ug ikabalaka. Kon nasakitan ka man makausa sa imong kinabuhi tungod sa pakyas nga relasyon, di na kini mo-matter karon kay lahi man ang karon ug ang kagahapon. Kalimti na ang kagahapon, ug maoy hangupa ang unsa ang naa karon ug sa umaabot para kaninyong duha.

Noy Tikyo

Gipatik sa mantalaang Superbalita Davao Pebrero 13, 2018.

View Comments