Pasiuna: Kini ang atong apas-sumpay sa suliran nga gipadangat kanato ni Agaton of Cotabato mahitungod sa iyang gikalibgan ug gikahadlokan nga pagpaminhod sa iyang nawong.
DEAR Agaton of Cotabato,
Karon, ania na gayud kita sa atong katapusan nga pag-atubang ning imong sitwasiyon. Ug ania pa ang lain nga mga posibilidad kung ngano nga mobinhod ang imong nawong.
Tumor
Adunay mga tumor nga dili kanser ang rason nga motubo kini diha o palibot sa mga ugat nga nagakontrolar sa sensasyon sa imong nawong ug unsaon kini niya paglihok. Kung ang tumor modako gayud, mamahimo kini nga moipit sa ugat. Ang imong mga sintomas niini modepende kung unsa ug asa dapita ang ugat nga naapektuhan. Ang nawong niini mamahimo nga maminhod, o di kaha maglisud ka og usap. Ang mga kaunoran sa imong nawong mamahimong huyang ug adunay problema usab unya sa pangdungog.
Pagburot sa ugat sa utok, kun brain aneurysm
Kini ang huyang ug nagburot nga dapit sa bungbong sa ugat sa utok. Kung gamay lamang dili kini mohatag og mga sintomas. Apan, sa nagkadako ug nagtubo ang maong aneurysm, moipit kini sa mga unod ug ugat sa utok, ug mosangpot sa pagpaminhod sa usa ka pikas sa nawong. Mamahimo usab nga pamation ang kasakit sa usa ka mata o di kaha magduha ang imong tan-aw sa palibot.
Ang pinaka problema niini kung ang maong nagburot nga ugat mobuto o moliki, kini unya ang hinungdan nga magdugo ang utok. Ang mahitabo unya niini ang kasakit sa ulo grabe kaayo ug manginahanglan gayud og emerhensiya nga medical nga pag-atiman.
Hemiplegic Migraine
Usahay ra kaayo kini nga klase sa migraine, nga gawas pa sa sakit sa ulo, makapabati sa pikas bahin sa lawas nga bation kini nga binhod o huyang. Kini mamahimo nga mahitabo sa nawong, sa mga paa ug sa mga bukton. Ang mga sintomas niini mamahimo nga molungtad sulod sa pipila ka oras ngadto sa pipila ka adlaw.
Maskin unsa pa man ang rason sa pagbanhod sa imong nawong, ako gayud nga isugyot kanimo ang pagpakigkita sa imong doctor sa mas sayo nga panahon ug dili na magpadugay-dugay pa aron anaa pa intawon mahimo ang doctor. Kay lisud na og mokompiyansa ra ka nga dili ra seryuso ang imong gibati. Hinumdomi marami ang namamatay sa maling akala.
Good luck!
Dr. Fritz
*****
Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga "Healthy is Sexy Secrets ni Dr. Fritz". Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o SunStar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!