(Pasiuna: Kini ang atong apas sumpay sa suliran nga gipadangat kanato ni Daisy of Babak, Samal mahitungod sa iyang mga pangutana nga nakahasol kaniya mahitungod sa pagkamaluibon sa iyang bana kaniya.)
DEAR Daisy of Babak, Samal,
Ug karon ania na kita sa atong pagpadayon sa atong pagtubag sa imong sitwasyon nga nakalibog kanimo mahitungod sa pagkamaluibon sa imong bana.
Sa niagi, atong gihisgutan nga gikinahanglan nga ipaguwa gayud nimo kung unsa man ang imong mga kasakit ug gibati nga walay ibilin bilin.
Apan, pangutan-a sab imong bana, kung wala pud baya siya'y mga kasakit diha kanimo. Timan-i nga dili lang ikaw ang anaa sa relasyon, kamong duha.
Paminawa sab siya kay tingali baya ug anaa usab siya'y problema diha kanimo ug mao ang rason kung ngano nga nangita kini sa laing kiliran ug paghupay sa iyang gibati.
Timan-i usab nga kung ang usa ka tawo gutom, ug walay pagkaon diha sa sulod sa balay, moguwa kini aron mahupay ang kakutoy sa iyang tiyan. Mao nga tan-awa gayud kanunay ang duha ka bahin sa relasyon, para tulin ang pagdagan niini.
Tan-awa ra gud nang barko kung hiwi gani ni o dili balanse, dako gayud ang posibilidad nga maunlod kini. Mao ra usab na ang mahitabo sa inyong relasyon. Ug dili lamang sa inyong relasyon, apan, sa relasyon sa uban pa man nga nagbasa diri kanato karon.
Apan, sa imong parte niini, gikinahanglan ka nga maghimo ug matinud-anon nga pagsulay sa pag-abre, pagkonektar og balik, isip pagsuporta sa pag-alim sa samad sa imong kasing-kasing.
Samtang, gikinahanglan sa imong kapikas nga pugngan nila ang ilang mga tinguhang dili maayo na usab unya aron mapaspasan ang pag-ayo sa inyong relasyon.
Gikinahanglan nga maghatag ka gayud og ensaktong atensyon usab sa iyang mga pagpaningkamot, inay sa dili paghatag niini og pagtagad tungod kay mahadlok ka nga masakitan na usab ka unya og balik ug mohatag ka na usab sa imong pagsalig sa imong bana.
Daghan pa gihapon unta kita og paga-istoryahan mahitungod sa sitwasyon niining maong isyu nga imong gipadangat kanato, apan, tungod kay nagkulang na usab kita karon sa espasyo, tugoti na usab ako nga pagahisgutan kini nato sa sunod pang edisyon ning atong patik. Hangtud na usab sa sunod!
Dr. Fritz
(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)