Editoryal: Kaugmaon sa Facebook

NASAYUD ba kamo nga ang social networking nga Facebook gigamit na karon sa mga sindikato sa druga sa nasud ug ubang kanasuran sa kalibutan?

Tingali, wa pa kita masayud niining maong hitabo mao nga nagpahibawo karon bahin niini ang Philippine Drug Enforcement Agency (PDEA) Region 11.

Gihimo kini sa maong ahensiya sanglit di sila buot nga mahisama ang ubang mga Pilipino sa gidangatan sa tulo ka mga Pilipino nga gisentensiyahan sa silot kamatayon didto sa nasud China.

Ang pagbahibawo bahin niining maong hitabao gihimo ni PDEA officer-in-charge Emerson Rosales kinsa nagpahimangno sa tanan nga kinahanglan magbantay sa kalihukan sa mga langyaw nga makaila pinaagi sa Facebook.

Gipasabot sa maong opisyal nga di kakompiyansahan ang mga sindikato nga migamit na karon Facebook diin nila hayluon ang inosenteng mga Pilipino.

Angay kita nga magbantay niining mga tawhana nga ang target mao kadtong mga Pilipino nga gustong makakuha og trabaho pinaagi sa online, mga Overseas Filipino Workers nga natapos na ang kontrata ug kadtong mga kababaehan nga nangita og pamanhunon nga mga langyaw pinaagi sa Facebook.

Tungod niini nga problema, apil na sa kampanya sa PDEA ang pagpahimangno sa katawhan nga magbantay kanunay sa sindikato sa druga nga migamit sa social networking.

Angay natong isilsil sa atong alimpatakan nga dunay mga tawo mga mapahimuslanon sa panahon.Busa, di dayon nato ihatag kanila ang pagsalig kay basin magmahay kita sa umaabot nga adlaw.

Di man dautan nga mangandoy kita nga moasenso ang atong kinabuhi, apan kinahanglan nga sigurohon nga lihetimo ang mga tawo nga buot motabang kanato.

Tinuod bitaw nga dunay mga tawo nabulahan tungod kay nagrasyahan pinaagi sa pagpakigsuod sa mga langyaw gamit ang Facebook. Apan, angay natong huna-hunaon sa makagdaghan nga higayon kung angayan ba sila sa atong pagsalig.

Kung mangandoy man kita sa maayong ugma, di lang unta nato ibutang sa peligro ang atong kaugamon sa Facebook.