Roldan: Pagyukbo sa haligi sa politika

Tuesday, August 9, 2011

DUNAY nagaingon nga maila lang ang maayong binuhatan sa usa ka tawo kung siya patay na.

Ang atong nasudnong bayani nga si Dr. Jose P. Rizal gimaldisyon ug gilutos sa kagamhanan sa España tungod sa iyang mga sinulat batok kanila.

Have something to report? Tell us in text, photos or videos.

Si Andres Bonifacio ug mga kauban gihukman usab nga kaaway sa estado sa ilang paghupot og armas batok sa madaug-daugong kagamhanan sa España. Mao usab ang kapariang Pinoy nga mas naila nga GOMBURZA nga gipatay pinaagi sa garote tungod sa ilang pagyagyag sa naghinobrang binuhatan sa pipila ka prayle ug kagamhanan ngadto sa mga Indio o mga nitibong Pinoy.

Hinuon, mapasalamaton kita karon nga daghan nang grupo nga nag-ila sa maayong binuhatan sa Pinoy samtang buhi pa pinaagi sa media, sa simbahan ug sa grupong sibiko.

Niadtong niaging semana, nagdulom ang kalibutan dinhi sa Davao tungod sa pagbangutan sa pagpanaw sa usa niini ka anak nga nagdala og garbo sa atong siyudad. Kini mao si kanhi sekretaryo ug mayor Luis T. Santos.

Sama sa tanang inilang personalidad sa kalibutan, mabulukon usab kaayo ang kinabuhi ni Santos. May istorya nga usa siya sa mga nanglalin gikan didto sa Luzon aron manimpalad dinhi sa Davao sa panahon ni kanhi Presidente Magsaysay tungod sa ilang pag-apil sa Hukbalahap niadtong panahon sa Hapon. Daghan silang nanglalin ug kasagaran kanila nagmalampuson sa ilang pagpanimuyo dinhi. May nanag-iya og dagkong negusyo sa troso, mina, komersiyo, samtang ang pipila nanimpalad sa natad sa politika.

Si Santos nahimong hepe sa kapulisan ug gitawag siya nga Diego Salvador tungod sa iyang di-mabaliko nga kampanya batok sa kriminalidad sama sa paagi karon ni Bise Mayor Rody Duterte.

Siya ang pinakadugay nga nagsilbi isip mayor sa dakbayan sa Davao tungod sa iyang duha ka terminong pagdumala nga nagpadayon sa panahon ni Presidente Marcos hangtud sa Edsa. Ang pinakahingpit niya nga kaaway sa politika niadtong panahona mao si kanhi Mayor Elias B. Lopez nga maoy magtutudlo ni Bise Mayor Rody sa politika.

Pagkahuman sa EDSA, napili si Santos isip sekretaryo sa Department of Interior and Local Government sa kagamhanan ni Cory Aquino.

Matud pa ni Bise Mayor Rody sa iyang programang "Gikan sa Masa, Para sa Masa" nga nibisita siya sa lamay ni Santos aron paghatod sa iyang personal nga pahisubo ngadto sa iyang nahabiling pamilya ug sa pagyukbo sa usa ka bantugang haligi sa politika.

Bisan tuod nga may panahon nga nagsungag sila sa politika, ang kamatayon maoy utlanan sa bisan unsa mang bingkil nga nahitabo tali kanila ug panahon sa pagpasaylo.

Nindot ang gibuhat sa Bise Mayor kay sa mosugot siya o dili, nasilsil na ang pangalan ni Luis T. Santos sa kasaysayan sa Davao ug sa kasingkasing sa mga tawo nga iyang natabangan sa iyang panahon.

Nidayeg usab ako sa pamilyang Santos nga taliwala sa hataas nga nakab-ot sa ilang mahal sa kinabuhi nga namatay, wa kini nangayo og espesyal nga tratamento gikan sa lokal nga kagamhanan, bisan gani ang tradisyonal nga pagbutang sa iyang haya diha sa City Hall isip pag-ila sa iyang serbisyo sa Davao. Pahulay nga dayon modangat unta kaniya.