Roldan: 'Save the Davao Shrine Hills'

Monday, August 15, 2011

NIADTONG niaging Sabado sa gabii, nitambong ako ug ang akong pamilya sa usa ka salo-salo ni Tiya Cording nga nagsaulog sa iyang ika-96 nga adlaw'ng natawhan diha sa usa ka restaurant sa dalang Legaspi.

Medyo sayo pa man i-uli, busa nagdesisyon kami nga manuroy una sa People's Park aron masayran kung unsa ang kabag-ohan didto ilabi na nga taliabot sang Kadayawan Festival.

Have something to report? Tell us in text, photos or videos.

Ang booth nga may berde nga tulda ang akong naduolan nga nailhan nako sa kaulahian nga iya sa Environmental Watch Committee (EWC) sa Ma-a Federation of Homeowner's Association Inc. Duna silay kampanya nga gitawag og "Save the Davao Shrine Hills".

Akong nahinabi ang mahigalaon ug may kaalam sa maong kampanya nga si Mr. J. Stacey Baird nga purok leader sa Ma-a ug usa sa mga nagtukod sa EWC.

Nahimamat ko usab si Norma Javellana nga beterano sa NGO. Mga napulo na ka tuig si Mr. Baird nga lumulupyo sa Ma-a ug para kanako mas Pilipino pa siya sa pagbati ilabi na sa pag-atiman sa kinaiyahan kaysa uban natong mga kababayan. Sayod kita nga taga Davao kung unsa ang Shrine Hills ug unsay mga kabag-ohan didto. Gitawag kini og "radio mountain" o "broadcast city" tungod sa kadaghan sa mga estasyon sa TV ug radyo nga may transmitter didto. Daghan sab og mga establisemento gikan sa golf driving range ngadto sa high-class nga kan-anan ug hi-end subdivisions.

Nagplano usab ang usa ka dakong unibersidad sa pagtukod og gambalay sa ibabaw sa bungtod. Apan sa tiilan sa Shrine Hills mao ang halapad nga mga pinuy-anan sama sa mga sakop sa Ma-a Federation of Homeowner's Association.

Sa tuig 2002-03, ang akong higalang si Chris Ranoa nagtawag kanako tungod sa makuyaw nilang kahimtang sa Nacilla Village.

Sa akong pagbisita, akong nakita ang dakong tipak sa yuta tapad sa iyang balay ug ang dako ug karaang reservoir sa tubig nga iya sa DCWD nga nag-agas sa tubig.

Si Chris ug iyang mga silingan namakwit na sa Ma-a Elementary School tungod sa kahadlok nga mosiak ang bungtod dala sa grabeng ulan sa niaging mga adlaw. Naapektohan usab ang Ma-a sa kusog nga flashflood sa niaging Hulyo nga nikalas og 30 ka kinabuhi busa gipakusgan na usab sa EWC ang ilang kampanya aron motabang ang gobyerno nga mapugngan ang pagkaguba sa Shrine Hills.

Matud pa sa leaflets nga ilang gipanghatag nga kaduha na nipaguwa ang Mines and Geo-sciences Bureau (MGB) sa DENR og report nga nahimutang sa fault zone ang lugar haduol sa wa madayon nga Artica Sports Dome sa Ma-a apil ang kasadpang bahin sa Shrine Hills.

Nibutyag si Diana Kristina B. Velasco, senior geologist sa MGB nga lig-on ang ibabaw sa bungtod apan huyang ang iyang pundasyon ug tiilan. Subo palandungon nga bisan sa maong pamahayag, ang 15th City Council nitugot gihapon sa pagpadayon sa pagtukod og subdivision ug mga dagkong imprastraktura sa Shrine Hills.

Nakalimot na ta sa nahitabo sa Cherry Hills Subdivision sa Antipolo? Busa mosalmot kita sa ilang signature campaign didto sa People's Park ug pakisayod sa ilang kampanya sa pagsulod sa http://www.savedavaoshrinehills.com.