Roldan: Kadayawan, hari nga kasaulogan

Sunday, August 21, 2011

PINASAHI ang kasaulogan karon sa “Kadayawan”.

Una sa tanan, tungod kay bag-o na ang mga lumilihok niini ug may bag-o sab kini nga imahen.

Have something to report? Tell us in text, photos or videos.

Ang Usbaw Dabaw na karon ang nagdumala sa tinuig nga pangilin nga nagbutyag nga mas ninduton pa nila ang kasaulogan.

Ug tuod man ato na kining nakita.

Ilang giusab ang logo sa Kadayawan nga gigamit ang color green nga paborito ni Mayor Inday Sara sa iyang pagkampanya sa niaging tuig ug may byline pa nga pulong “The King of Festivals.”

Morag pareha sa popular ad sa beer nga “Bud… The King of Beers.”

Sa kinatibuk-an, ang Kadayawan usa ka opisyal nga kalihukan sa kagamhanang lokal sa Davao alang sa paghatag og bili sa kultura sa lumadnong Dabawenyo ug pagpasalamat sa maayong ani sa kabukiran ug kadagatan.

Nahimo na usab kini nga kalihukan alang sa turismo ug komersyo.

Apan matag tuig gidumala ang maong pangilin sa pribadong grupo nga Kadayawan Foundation nga may lahi nga logo ug letra nga porma sa Philippine Eagle.

Ang TV ads sa bag-ong logo nagpakita sa naglupad nga digital eagle padulong sa mga letra ug nahimong letra Y sa Kadayawan.

Maayo ang pagkahimo bisan tuod simple lang kay sa close-up nga pagtan-aw maklaro ang agila, apan sa layo, niporma kini og korona sa usa ka hari.

Morag nagaingon nga himuong hari sa tanang pangilin ang Kadayawan sa panahon sa bag-ong Mayor.

Sa mga nakahibalo sa kasaysayan, ang Kadayawan gitawag kaniadto nga “Apo Duwaling” nga maoy tulo nga kinaiya sa Davao — ang Mt. Apo (pinakataas nga bulkan), durian (ang humot nga hari sa mga prutas) ug waling-waling (hari sa mga orchids).

Adunay sugyot kaniadto nga dugangan og “Gat” ang Duwaling alang sa “dagat”, apan wa madayon tungod kay wala nay nindot nga dagat ang Davao City kondili sa Igacos na lamang.

Usa kini ka proyekto ni kanhi Mayor Zafiro Respicio sa tuig 1987.

Bag-o lang nahuman ang Edsa revolt busa naghinamhinam ang mga Dabawenyo og kabag-uhan busa swak na swak kaayo ang Apo Duwaling.

Apan bisan tuod nga may bag-o na nga tigdumala ug imahen ang Kadayawan, nagpabilin ang mithi niini nga kultura ug pagpasalamat.

Gani ang mga organizers karon nagpalawig sa tri-people identity sa Mindanao.

Ang motif ug color karon kay gikan sa kulturang Maranao nga makita nato sa mga buntings ug dayan-dayan palibot sa atong dakbayan.

Nagsul-ob sab si Mayor Sara og berde nga sinawong bisti sa usa ka babayeng Maranao nga may turban sa ulo isip opisyal nga litrato alang sa Kadayawan.

Sa laing bahin, managkalahi ang gibati sa mga Dabawenyo sa mga kausaban sa Kadayawan.

May gustong ibalik ang karaang konsepto niini nga pagpasalamat ug kultura nga way apil ang komersyo ug abuso sa mga mapahimuslanon sa panahon.

Nabalaka sila nga mawala na ang mensahe sa Kadayawan ug mapulihan og kwarta ug kapistahan lamang. Apan alang kanako bisan usa pang logo o tigdumala, may maayong sangputanan ang Kadayawan ug kini mao ang paglaum ug kalinaw sa Mindanao.

Unta mahunong na ang bangi tali sa gobyerno ug MILF, MNLF ug sa CPP/NDF.