Roldan: Positibong komunidad

Friday, September 23, 2011

USA sa mga maanindot nga butang sa usa ka manunulat mao nga makahimo ka sa imong opinyon sa bisan usang butang bisan dili kini tuohan sa uban. Ang risgo lang kay kung dili kini i-printa sa editor o ang mambabasa mobatikos kaniya tungod sa klaro niining pagdapig sa usa ka kampo o di sakto ang impormasyon nga gibutyag.

Sa tinuod, ang reaksyon sa mga mambabasa ang kanunay'ng bantayan sa mga manunulat. Daw tapik sa abaga ang ilang reaksyon nga nag-ingon "sir, maayo kang mosulat og mo-istorya apan dili kami hungog nga mambabasa."

Have something to report? Tell us in text, photos or videos.

Kusog ang gitawag nga readers o viewer's engagement karon ilabi na sa bag-ong teknolohiya sama sa internet, cell phones, ug uban pa. Lain pang mabuhat sa usa ka manunulat mao ang pagsulat sa kinabuhi sa nagkadaiyang tawo.

Sa niaging mga adlaw, nag-interbyu ako og tulo ka mga persons living with HIV (Plhiv); duha ka lalaki ug usa ka babaye, isip kabahin sa gigama ko nga internal assessment sa programa sa Alliance against Aids in Mindanao (Alagad-Mindanao). Dili na kini ang una kong higayon nga makahinabi ang Plhiv apan kining katapusan mas duol og medyo personal kaayo.

Anaa sila sa 25-35 anyos ug dili sama sa atong gituohan nga masakiton ug payat kay silang tulo napuno sa kinabuhi ug paglaum. Pareha lang sila sa mga tawo nga makita natong magpunsisok sa daplin sa dalan nga naghulat og jeep o kaha sa mga tawo nga naggamit og pushcart sulod sa grocery stores, mga tawo nga nangaligo sa swimming pool o beach, ug mga tawo nga makatapad nato sa lingkuranan sa simbahan. Wala ko na panumbalinga kung giunsa nila pagkuha sa HIV apan gusto ko mahibaloan kung unsay ilang kahimtang karon nga nakatukod sila og positive community sa mga may HIV.

Niadtong 2009, sobra 60 ka mga Plhiv ang nagporma og grupo nga gitawag og Mindanao AIDS Advocates (MAA), Inc. Mahinumduman ko nga ang HIV ug Aids nga isyu gihulagway sa usa ka kanhi nga OFW nga si Sara Jane. Apan karon ang positibong komunidad mao nay naghulagway kanila. Natukod sila aron mahimong instrumento sa pagsabwag sa impormasyon kabahin sa maong sakit aron mabantayan sa tanan, ilabi na sa mga bata ug batan-on.

Ang bag-ong taho nag-ingon nga ikaduha ang Davao City human sa Cebu nga may pinakataas nga kaso sa HIV. Apan dili sayon ang pag-organisa sa positibong komunidad. Bisan ang tulo nako ka higala nga tang-an isip volunteer peer counselor sa Alagad nagbutyag nga lisud gihapon nila paapilon ang mga Plhiv ilabi na kadtong mga propesyonal, mga athletic, mga may kaya ug kadtong nagpabilin pang nagtago sa tinuod nilang kahimtang sa ilang mga pamilya. Matud pa nila nga nakaagi usab sila sa maong hugna sa kinabuhi human sila ma-diagnose nga positibo sa HIV apan sa kaulahian ilang nadawat nga may ugma pang umaabot sa mga sama kanila nga may gihambin nga balatian. Nahimo nilang misyon ang pag-edukar sa mga gustong maminaw sa ilang kasinatian aron dili mahisama kanila. Nasayran nato nga way namatay sa Aids kon dili sa komplikasyon nga dala niini.