Roldan: Bag-ong hepe sa Bureau of Customs-Davao

Sunday, September 25, 2011

NIADTONG buntag sa Septyembre 21 niadto ako sa opisina sa Bureau of Customs sa may Barangay Sasa tungod sa balita nga moabot si Gen. Lim nga bag-ong Deputy Commissioner for Intelligence sa Bureau of Customs.

Ikaduha ko na kining pagbisita sa usa sa pinaka-importante nga revenue-generating nga ahensiya sa gobyerno nga gituohan usab nga usa sa pinakakurakot. Ingon pa sa kaila nako sa sulod nga ika-5 kuno ang ilang buhatan sa listahan. Nahibaloan ko usab nga kanunay malampasan sa maong distrito ang ilang target nga P5.2 billion matag tuig sa sulod sa 10 ka tuig nga milabay. Gani matud pa sa out-going District Customs Collector Edmundo Magdaraog nga nilapas na ang ilang koleksiyon og P134 million karong tuiga.

Have something to report? Tell us in text, photos or videos.

Nindot gayud diay kaayo kung mao. Apan gamay ra ang nakahibalo niini busa mas maayo nga dugangan pa nila ang transparency ug ang pagpahibalo sa katawhan sa ilang gibuhat basin pa'g matuman ang "matuwid na landas" nga dikektiba ni PNoy.

Niadtong adlawa, giablihan sa customs ang 17 ka container vans nga may sulod nga imported rice ug uban butang gikan sa Taiwan ug US nga gibanabanaang nagkantidad og Php 21M nga walay saktong papeles.

Congratulations sa Customs Intelligence and Investigation Section (CIIS) nga gipangulohan sa kaulohan ni Brig. Gen. Danilo Lim (Ret), ug mga operatiba niini nga sila si Director Filomeno C. Vicencio, Jr., Eric G. Albano, Mitchell V. Verdeflor, Atty. Christian Flores, Al Tomas Albano, Felix Espino III, Orlando Sangid ug Garrett Jacinto. Siyempre nag-una usab sa pag-abli sa container vans mao si Edmundo Magdaraog ug ang bag-ong mopuli kaniya nga si Atty. Martiniano Bangcoy.

Ang 14 ka container vans may sulod nga 6,500 ka sako sa premium rice ug malagkit nga tingali preparasyon para sa umaabot nga Pasko. Matud pa ni Lim nga nalipay siya nga nasaknit nila kining maong kontrabando aron ipakita nga seryuso ang gobyerno sa paglutos sa mga malditong negusyante ug pagsumpo sa kurapsyon sulod sa ilang han-ay. Bisan siya mismo nituo nga daghang ayuhon sa maong ahensiya ug pag-usab sa public image sa customs nga mao usab ang marching order kanila gikan sa pangulo.

Ang consignees sa maong container vans kay ang Jexand Trading ug RMG 99 Trading nga matud pa nga ang naulahi usa ka dummy o dili tinuod nga kompaniya dinhi sa Davao. Mahimong mapasakaan og kaso ang mga consignees sa paglapas sa Sections 2503 of 2530 sa Tariff and Customs Code of the Philippines, dugang pa ni Lim.

Nindot kaayo kung magpermanente nga magpakitang-gilas ang customs sa paggukod sa mga smugglers ug tax evaders sa atong palibot. Nituo ako nga seryoso si Commissioner Raffy Biazon ug Lim sa paglimpyo sa ahensiya ug sa pagpataas sa ilang koleksyon sa tibuok nasud.

Nahinabi ko usab si Atty. Bangcoy, ang bag-ong District Customs Collector nga lumad nga taga Bohol ug siya mismo mopunting usab sa mando sa atong pangulo nga limpyohan ang ahensiya ug patas-an ang koleksyon sa buhis sa iyang distrito.

Sa makausa pa congrants mga sir ug good luck ngadto sa bag-ong Customs Collector.