Roldan: MR GAD

Sunday, October 2, 2011

NAKASAGAP ako og balita nga nagpahigayon ang barangay council sa Barangay Sto. Niño, Mintal, og training kabahin sa Gender and Development (GAD). Congrats nimo Kap Dodong del Rosario ug sa imong mga opisyal diha.

Kung wala ako masayop, ang nagtabang niini mao ang Integrated Gender and Development Division (IGDD) nga anaa ubos sa City Mayor’s Office ug pipila ka non-governmental organizations.

Have something to report? Tell us in text, photos or videos.

Buot niining training nga ma-mainstream ang isyu sa gender -- nga sa mga kababayen-an pa “pag-genderize” sa kabarangayan sa dakbayan.

Pinasahi kini sa ubang nangaging training tungod kay nagtukod ang barangay sa gitawag nga Men’s Responsibilities in Gender and Development o MR GAD.

Mokabat na’g sobra 10 ka mga barangay nga may susamang grupo sa ikatulong distrito sa Davao City nga mora’g katimbang sa Council of Women sa barangay.

Nalipay sab ako niini tungod kay ang pag-organisa sa mga lalaki alang sa pagtabang sa kalambuan ug pagpagahum sa kababayen-an dili masabtan sa uban.

Gani, mokatawa lang ang mga women activists kaniadto kun ilang madungog nga tukuron ang susamang grupo alang sa kawsa sa kababayen-an.

Hasta ang mga funding agencies sama sa Asia Foundation nga nitabang sa pagmonitor sa Women Development Code dili mohatag og bisan sentimo sa susamang kalihukan kaniadto.

Apan bisan tinuod nga bag-o pa ang MR GAD, ang konsepto niini dugay na.

Niadtong 2000, usa ka grupo sa mga babayeng lideres, mga abogado, anaa sa academe nga sakop sa Ad Hoc Committee nagtapok didto sa Malagos diin nakahimo sila og Malagos Declaration sa katukoran sa Association of Men Involved in Gender Advocacy (Amiga).

Tua didto sila si kanhi konsehal Nenen Orcullo nga sponsor sa women’s code ug Luz Ilagan, Lyda Canson sa Development of People’s Foundtion, Laperacion Daplin sa HRMO, Malou Bermudo, Marilyn Agonia sa CSSDO, Sr. Josephine Bacaltos, Pat Montemayor, Atty. Adoracion Avisado, ug uban pa. Gisulayan kining konsepto sa pipila ka barangay sa district 2 nga maayo ang resulta apan nagkinahanglang adunay opisina sa gobyerno sama sa Integrated Gender and Development Office (IGDO) nga motutok niini.

Nahanaw kini sa dihang nausab ang kamada sa pulitika sa Davao apan niadtong 2006-07, nibalik ang MR GAD.

Gitukod kini ni kanhi konsehal Leo “Happy LA” Avila nga mao pud ang amahan sa Children’s Code sa Davao ug gisuportahan nila ni Atty. Wendell Avisado, city administrator; Erwin Alparaque, Alex Roldan, og pipila pa ka lideres sa syudad.

Dunay panahon nga nagpahigayon kini og “fashion show” sa mga inilang sakop sa MR. GAD sa usa ka hotel sa dakbayan aron makapangalap og pundo alang sa ilang kalihukan.

Ang health NGO ni Dr. Naraval naglusad usab og programa sa pagpakusog sa grupo sa mga kalalakihan nga mosuporta sa kalambuan og kawsa sa kababayen-an.

Para kanako, usa kini ka kalihukan nga angayang suportahan natong tanang mga kalalakin-an isip pag-ila sa mahinungdanong papel ug pwersa sa mga kababayen-an alang sa kaugmaran sa atong nasud ug sa sosyedad.

Unta dili kini usa ka kaso sa “ningas-cogon” sa mga opisyal sa gobyerno para pang pogi-points alang sa sunod eleksyon apan alang sa tinuod nga kawsa natong tanan. Hinaut pa unta!