Roldan: Mo-fast retire si Pacman?

Monday, November 21, 2011

ANG tawo karong panahona naggukod sa oras. Gusto nila kanunay'ng gadali. Tungod sa progreso sa Information Technology, gitudloan kita unsaon nga mas paspas ang lihok, ug mahimong smarter ug mamugnaon kita. Wala na kadtong gitawag nga Jurassic computers nga hastang dagkoa ang kaha ug hastang dugaya ang resulta sama sa mga PC-XT computers kaniadto. Karon ang panahon sa mga laptops, notebooks, IPODs, IPADs, ug unsa pang pad. Mora'g ang tanan puwede nang mokonektar sa internet.

Hasta ang pagpangita sa lubong sa atong mahal sa kinabuhi ug mga kaila sa guot nga memorial park dali rang matultulan pinaagi sa computer. Puwede na gani motambong sa pangadye ug haya sa namatay bisan tua sila sa Amerika o Canada tungod kay may CCTV na ang mga punerarya karon isip add-on sa ilang serbisyo.

Have something to report? Tell us in text, photos or videos.

Ang Dakbayan sa Dabaw may kaugalingon sab nga website diin puwede nimong ma-link ang halos tanang opisina sa gobyerno. Ang mga daan ug gianayan na nga kopya sa ordinansa ug resolusyon sa archive o bodega sa Sangguniang Panlungsod puwede nang pangitaon pinaagi sa computer.

Kung kaniadto maabtan ka og siyam-siyam sa pagkuha og datos ug estatistika kabahin sa atong siyudad, karon dali na lang kaayo pinaagi sa internet. Hasta ang mga kaigsuonan natong mga lumad sa kabukiran naggamit na'g computer sa ilang mga eskuwelahan kay lagi puwede man gayud silang makagamit basta naa lay pasilidad ug kahibalo sila mogamit.

Mao kini ang gibuhat sa Worldwide Filipino Alliance (WFA) nga naghatag og mga computers sa mga batang Ata-Manobo didto sa Barangay Tibi-tibi, Talaingod, Davao del Norte aron makakat-on pod sila sa maong teknolohiya. Mao nga makaingon ko nga paspas na gayud karon ang panahon.

Hasta ang kaminyuon ug annulment sa kasal kay dali na lang basta may kuwarta ug kahibalo ka kung kinsay duolon.

Sa niaging mga dekada niguwa ang mga bag-ong pulong nga nagpakita sa paghandom sa tawo nga mopaspas. Sama pananglit sa fastfoods nga nipuli sa atong naandang turo-turo ug carenderia nga ang kalainan lang kay sa carenderia, mokaon sa ka una mobayad samtang sa fastfoods, mobayad una, unya pa mokaon.

Ang atong mga stereo component may fast reverse ug fastforward sab aron dali makit-an ang kanta. Naa say pulong nga fastbreak sa dula sa basketball nga gikalipay kaayo sa manan-away. Gipa-fasttrack sab sa DPWH ang ilang mga proyekto kay taliabot na ang Pasko ug daghan ang mogamit sa dalan.

Sa pagkahuman sa kontrobersiyal nga away sa ring sa atong Pambansang Kamao nga si Manny "Pacman" Pacquiao ug Juan Manuel "El Dinamita" Marquez miguwa ang balita nga mo-fast retire na daw si Marquez kay tiguwang na ug katulo na siya gihikawan nga makuha ang korona nga gihuptan ni Pacman. Hasta sab ang presidente sa World Boxing Council ni fastbreak usab sa pag-ingon nga gikawatan sa bakos si Marquez sa ilang away ni Pacquiao didto sa Nevada . Ang pangutana kay kung mo-fast retire usab si Manny sa iyang pagka-kongresista o pagka-boksingero tungod kay naapektohan daw ang kalidad sa iyang dula kung daghan siya'g giatiman? Si Pacman ra gyud ang makatubag ani mga kauban.